बाँके: बुधबार बिहान बाँकेको बैजनाथ गाउँपालिकामा एक असामान्य दृश्य देखियो, जब गाउँपालिकाकी उपाध्यक्ष निर्मला रोकायले कार्यालयको मुख्य गेटमा आफैंले ताला लगाइन्। समयपालनमा लापरबाही देखिएको भन्दै उपाध्यक्षले यो कदम चाल्नु परेको बताएकी छन्।

“सुशासनको नारा सहित अब बदलिन्छ बैजनाथ” भन्ने प्रतिबद्धताका साथ उपाध्यक्ष रोकायले पटक–पटक चेतावनी दिँदासमेत कर्मचारीहरू समयमै कार्यालय नआएको भन्दै बिहान ठीक १०:१७ बजे तालाबन्दी गरेकी थिइन्।

उनका अनुसार गाउँपालिका अध्यक्ष, प्रमुख प्रशासकीय अधिकृत, लेखा तथा प्रशासन शाखाका प्रमुखहरू तालिममा सहभागी हुन गएका कारण अनुपस्थित थिए। तर बाँकी शाखा प्रमुख तथा कर्मचारीहरू समेत समयमा कार्यालय नआएकोप्रति उनले गुनासो व्यक्त गरिन्। “सधैंजसो ढिलाइ हुन्छ। मैले पर्खें, तर कोही आएनन्। काममा असर पर्न थाल्यो, त्यसैले बाध्य भएर ताला लगाएँ,” उपाध्यक्ष रोकायले भनिन्।

यस घटनाका कारण सेवा लिन आएका नागरिक दिनभर कार्यालय बाहिरै बस्न बाध्य भए। कर्मचारीहरू समेत गेट बाहिरै बस्नुपरेको थियो। इन्जिनियर धर्मेन्द्र आचार्यले यो कदम रहस्यमय रहेको बताएका छन्। “किन तालाबन्दी गरियो भन्ने स्पष्ट नहुँदा हामी अनिश्चितमा थियौं,” उनले भने। उपाध्यक्षले दिउँसो करिब ३ बजे ताला खोलिन्।

केही समयअघि सार्वजनिक भएको महालेखा परीक्षकको प्रतिवेदन अनुसार, बाँके जिल्लामा सबैभन्दा धेरै बेरुजु देखिएको गाउँपालिका बैजनाथ नै हो। यस्तो पृष्ठभूमिमा यो कदमले अझै गम्भीर बहसको ढोका खोलेको छ।

गाउँपालिकाका प्राविधिक प्रमुखले भने यो कदमप्रति असहमति जनाउँदै भने, “नीतिगत निर्णयमार्फत कारबाही गर्न सकिने अवस्थामा घरजस्तो शैलीमा ताला लगाउनु गैरजिम्मेवार कार्य हो।”

घटनापछि सामाजिक सञ्जालमा उपाध्यक्ष रोकायको कदमको चर्चा चुलिएको छ। कतिपयले यसलाई कडा तर आवश्यक कदम भनेका छन् भने अन्यले संवाद र संयमको बाटो रोजिनुपर्ने सुझाव दिएका छन्।

उपाध्यक्ष रोकायको भनाइमा कार्यालयमा समयमै उपस्थित नहुनु पनि समयको भ्रष्टाचार हो। उनले आगामी दिनमा कार्यपालिका बैठकमार्फत नीति निर्माण गरेर कडा कारबाही गरिने संकेत दिएकी छन्।अब बैजनाथ गाउँपालिकाको कार्यशैली कसरी रूपान्तरण हुन्छ र कर्मचारी समयपालनमा कति सुधार आउँछ, त्यो भने हेर्न बाँकी छ।