डोल्पा । हिमाली जिल्ला डोल्पाको त्रिपुरासुन्दरी नगरपालिका–११ मुँहुमा प्रथम वडा कप सञ्चालन गरिने भएको छ।

त्रिपुरासुन्दरी नगरपालिकाको वडा नं ११ मुँहुको आयोजनामा “राष्ट्रका लागि खेल तथा स्वास्थ्यका लागि खेलकुद” भन्ने मूल नाराका साथ ‘प्रथम वडा कप प्रतियोगिता–२०८२’ सञ्चालन गरिने वडा अध्यक्ष चन्द्ररूप डसालले जानकारी दिए।

शुभ दीपावली तथा भाईटिकाको अवसर पारेर आयोजना गरिने ‘वडा कप २०८२’ प्रतियोगितामा वडा तथा गाउँस्तरका विभिन्न खेल र सांस्कृतिक कार्यक्रम समेत समावेश गरिने वडा अध्यक्ष डसालले जानकारी दिए।

डसालका अनुसार प्रतियोगितामा पुरुष भलिबल, घोडा दौड, छेलो फाल्ने, हाईजम्प र लङ्जम्पका साथै विविध सांस्कृतिक प्रस्तुतीहरु हुने छन्।

खेलकुद मार्फत आपसी सम्बन्ध सुदृढ गर्दै स्वास्थ्य, एकता र सौहार्दको सन्देश प्रवाह गर्ने उद्देश्यले प्रतियोगिता आयोजना गरिएको बताइएको छ। आयोजकका अनुसार सम्पूर्ण खेलाडीहरुलाई खाना बस्नको समेत व्यवस्थापन समेत गरिएको छ।

खेल विधा तर्फका सम्पूर्ण टिम दर्ता मिति २०८२ असोज २८ गते साँझ ५:२० बजे सम्म कायम गरिएको छ भने खेलहरू असोज २९ गतेदेखि सुरुवात गरिने छ।

टीम दर्ताको लागि भलिबल तर्फ दर्ता शुल्क रु. १०,००० ,घोडा दौडका लागि रु. १,५००, छेलो फाल्नेका लागि रु. १, ००० , हाईजम्प र लङ्जम्पका लागि रु. ५०० तोकिएको छ ।

प्रथम वडा कप प्रतियोगितामा भलिबलतर्फ प्रथम हुनेलाई नगद रु. ५०,५०५, ट्रफि, मेडल र प्रमाणपत्र, द्वितीय हुनेलाई नगद रु. ३०,३०५, ट्रफि, मेडल र प्रमाणपत्र, तृतीय हुनेलाई नगद रु. १५,१०५, ट्रफि, मेडल र प्रमाणपत्र प्रदान गरिने छ।

हाईजम्प र लङ्जम्पतर्फ प्रथमस्थान हासिल गर्नेलाई रु. २,५०० र प्रमाणपत्र ,द्वितीय हुनेलाई रु. १,५०० र प्रमाणपत्र , तृतीय हुनेलाई रु. १,००० र प्रमाणपत्रको व्यवस्था गरिएको छ।

त्यस्तै घोडा दौडतर्फ प्रथमहुनेलाई रु. १०,००० र प्रमाणपत्र,द्वितीय: हुनेलाई रु. ५,००० र प्रमाणपत्र प्रदान गरिने छ।

प्रतियोगितामा त्रिपुरासुन्दरी नगरपालिका भित्रका ११ वटा वडाका क्लब, गाउँ र वडाले मात्रै आफ्नो टीम दर्ता गराउन सक्नेछन् ।

आयोजकले नगरपालिका भित्रका क्लब, गाउँ र वडाहरुलाई खेलाडी पठाई प्रतियोगिताको शोभा बढाउन समेत आग्रह गरेको छ।

हेर्नुहोस् सूचना