बलिउड अभिनेता विक्की कौशल र अभिनेत्री कट्रिना कैफको बिहेको मिति नजिकिँदै छ। उनीहरु दुवैका परिवार बिहेको तयारीका लागि भारतस्थित राजस्थान पुगिसकेका छन्। यी दुई कलाकारको विवाह समारोह ७ देखि ९ डिसेम्बरसम्म राजस्थानको सवाई माधोपुरस्थित सिक्स सेन्स फोर्ट बर्वारामा हुन लागेको हो। 

अहिले सिंगो बलिउड र विक्की-कट्रिनाका प्रशंसकहरु उनीहरुको नयाँ जीवनको सुरुवात हेर्न आतुर छन्। विक्की र कट्रिनाको बिहेको तयारीबारे खबरको सिलसिलामा फेरि अर्को जानकारी बाहिर आएको छ।

कोइमोइका अनुसार उनीहरुलाई आफ्नो बिहेको भिडियो खिच्न दिएबापत सय करोड भारु पाउने ‘अफर’ आएको छ। यदि उनीहरुले बिहेको फुटेज बिक्री गरे भने पनि त्यति नै रकम पाउने छन्।

केही महिनादेखि विक्की र कट्रिना आफ्नो बिहेको कुरा गोप्य राख्ने कोसिस गरिरहेका छन्। उनीहरुले बिहेमा सीमित पाहुनालाई निम्तो दिएका छन्। बिहेमा पाहुनालाई पनि मोबाइल चलाउन नपाउने र बाहिरी मान्छेसँग सम्पर्क गर्न नपाउने नियम राखेका छन्। यसरी मिडिया र प्रशंसकहरुले उनीहरुको बिहेका फोटो वा कार्यक्रममा के भइरहेका छन् भन्नेबारे कुनै जानकारी पाउने छैनन्।

यसले विक्की र कट्रिनाको बिहेले झनै चर्चा पाइरहेको छ। यही कारण एक ओटीटी प्लेटफर्मले उनीहरुको बिहेको फुटेज किन्न सय करोड भारु दिने प्रस्ताव राखेका हुन्। विदेशतिर चर्चित सेलिब्रेटीले आफ्नो बिहेको फोटो र फुटेज ठूलो रकम लिएर अनलाइन प्लेटफर्म वा म्यागेजिनलाई बेच्ने चलन छ। यही ट्रेन्ड हालसालै बलिउडमा पनि चल्न थालेको हो।

यसअघि यस्तै ‘अफर’ अभिनेत्री दीपिका पादुकोण र अभिनेता रनवीर सिंहले पनि पाएका थिए।

उनीहरुले भने आफ्नो बिहेको विशेष क्षण मिडियामा सार्वजनिक नगर्ने निर्णय गरेका थिए। यदि विक्की र कट्रिनाले सो रकम लिएर आफ्नो बिहेमा मिडियालाई आउन दिए भने दर्शकले उनीहरुका बिहेको लाइभ कार्यक्रम र परिवार तथा साथीहरुको अन्तर्वार्ता समेत हेर्न पाउने कोइमोइले लेखेको छ।