काठमाडौं । सर्वोच्च अदालतले पूर्वप्रधानमन्त्री केपी शर्मा ओली र तत्कालीन गृहमन्त्री रमेश लेखकमाथि भइरहेको अनुसन्धान २६ चैतभित्र टुंग्याउन आदेश दिएको छ।

न्यायाधीशद्वय विनोद शर्मा र सुनिल कुमार पोखरेलको इजलासले उनीहरूलाई तत्काल थुनामुक्त गर्न अस्वीकार गरेको हो। तर तोकिएको समयभित्र अनुसन्धान पूरा नभए उनीहरूलाई हिरासतबाट मुक्त गर्नुपर्ने आदेश पनि दिएको छ।

अदालतले फौजदारी कार्यविधि संहिताअनुसारको प्रक्रिया पूरा गरी हिरासतबाहिर राखेर थप अनुसन्धान गर्न सकिने उल्लेख गरेको छ।

भदौ २३ मा भएको जेनजी आन्दोलनका क्रममा १९ जनाको ज्यान जाने गरी बल प्रयोग भएको र त्यसलाई रोक्न आवश्यक प्रयास नगरिएको आरोपमा उनीहरूलाई १४ चैतमा पक्राउ गरिएको थियो। सो प्रकरणमा ज्यान मुद्दाअन्तर्गत अनुसन्धान भइरहेको छ।

प्रहरीले जिल्ला अदालत काठमाडौंको अनुमति लिएर उनीहरूलाई हालसम्म हिरासतमा राख्दै आएको छ।