कुलेन्द्र शाही/सुर्खेत– जाजरकोटको शिवालय गाउँपालिका–७ स्थित वीरेन्द्र माध्यमिक विद्यालय, जुँगाथापाचौरमा कक्षा १२ को परीक्षा दिँदै गरेका विद्यार्थीहरू मोबाइल प्रयोग गर्दै गरेको तस्बिर सार्वजनिक भएको छ। वैशाख २१ गते देखि जारी कक्षा १२ को परीक्षामा २६ गते भएको सामाजिक विषयको परीक्षाको दौरान खिचिएको भनिएको उक्त तस्बिरले अहिले व्यापक चर्चा बटुल्दैछ।

नाम नखुलाउने शर्तमा एक परीक्षार्थीले उक्त तस्बिर आफूले नै खिचेको दाबी गर्दै सञ्चारमाध्यमलाई उपलब्ध गराएका छन्। “फोटो मैले नै खिचेको हो,”ति विद्यार्थीले भने, “परीक्षा दिने विद्यार्थी शिवालय–३ स्थित सरस्वती माध्यमिक विद्यालय, सिमाका हुन्। म ती विद्यार्थीहरूलाई चिन्छु पनि।”

तर, यस विषयमा विद्यालयका केन्द्राध्यक्ष शेर बहादुर खत्रीसँग सम्पर्क गर्ने प्रयास गर्दा सम्पर्क हुन सकेन। यता, शिवालय गाउँपालिकाका वरिष्ठ शिक्षा अधिकृत मान बहादुर बस्नेतले भने छानबिन नगरीकनै उक्त फोटो शिवालयको नभएको दाबी गरे। उनले  तस्बिर अन्यत्रको हुन सक्ने तर्क राखे। ईजनचासो सग कुरा गर्दै प्रमुख बस्नेतले यो विषयमा चाँडै नै छानबिन हुने र फोटो उक्त विद्यालयको हो या होइन भन्ने विषय जानकारी गराउने बताएका छन्।

शिवालय गाउँपालिका–७ का वडा अध्यक्ष टाइरेन्ट शाहीले भने छानबिन नै नगरी फोटोको खण्डन गर्नु उचित नहुने बताए। “फोटो हाम्रो विद्यालयको हो भन्ने ठोस आधार छैन, यथार्थ पत्ता लगाउन छानबिन गर्छौं,” उनले भने।

राष्ट्रिय परीक्षा बोर्डले परीक्षा हलमा मोबाइल लगायत विद्युतीय सामग्रीहरू लैजान निषेध गरेको छ।