कर्णालीका मार्क वाटले अविजित सतकीय पालि खेलेपछि कर्णाली याक्सले नेपाल प्रिमियर लिग (एनपिएल) मा पहिलो जित निकालेको छ ।

कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट स्टेडियममा शनिबार भएको खेलमा कर्णालीले  लुम्बिनी लायन्समाथि नौ विकेटको फराकिलो जित निकाल्यो ।

जारी सिजनको एनपिएलमा मार्क वाटको यो पहिलो सतक हो ।

जितका लागि लुम्बिनीले दिएको एक सय ५७ रनको लक्ष्य पछ्याएको कर्णालीले १२.२ ओभरमा एक विकेटको क्षतिमा एक सय ६१ रन जोड्लै लक्ष्य पूरा गरेको हो ।

कर्णालीका लागि मार्क वाटले ४४ बलमा ६ चौका र १२ छक्काको सहयोगमा एक सय १४ रन बनाउनुभयो । यस्तै विलियम बसिस्टोले अविजित २९ र ओपनर प्रियांक प्रान्चालले १२ रन बनाए । बलिङमा लुम्बिनीका शेर मल्लले एक विकेट लिए।

यसअघि टस हारेर पहिले ब्याटिङको निम्तो पाएको लुम्बिनीले निर्धारित २० ओभरमा आठ विकेटको क्षतिमा एक सय ५६ रन बनाएको थियो ।

लुम्बिनीका लागि कप्तान रोहित पौडेलले सर्वाधिक ४९ रन बनाउनुभयो । यस्तै रुबेन ट्रम्पलमानले खविजित २९, जोहानीस जोनाथन स्मितले २३ र डी’आर्की शर्टले १९ रन बनाउनुभयो । अन्य अन्य ब्याट्सम्यानले दोहोरो अङ्कमा रन बनाउन सकेनन् ।

बलिङमा नन्दन यादवले दुई विकेट लिनुभयो । यस्तै सोमपाल कामी, गुलशन झा, मार्क वाट, विपिन शर्मा र युवराज खत्रीले एक एक विकेट झारे ।