डोल्पा– डोल्पाको ठुलीभेरी नगरपालिकाले सञ्चालन गरेको प्रधानमन्त्री रोजगार कार्यक्रम अन्तर्गतको सीपमूलक तालिमको समापन भएको छ। बिहीबार नगर प्रमुख सुबर्ण कुमार बुढा ज्युको प्रमुख आतिथ्यतामा  रोजगार शाखा तथा प्रधानमन्त्री रोजगार कार्यक्रमको समन्वयमा सञ्चालन कार्यक्रमले आयोजना ५० दिन लामो तालिमको औपचारिक रूपमा सम्पन्न भएको नगरपालिकाका निमित्त प्रमुख प्रशासकीय अधिकृत डिल प्रसाद रोकायले जानकारी दिए।

“सीप सिकौं, रोजगार बनौं” भन्ने मूल नारासहित सञ्चालित तालिममा नगरपालिका भित्रका वडा नं. ०७ र ०८ का ४० जनाले सहभागी भई विभिन्न व्यावसायिक सीप सिकेका छन्। कार्यक्रममा बोल्दै नगर प्रमुख बुढाले अन्य वडामा पनि यस्ता तालिम सञ्चालन गर्ने प्रतिबद्धता व्यक्त गर्दै सीपमूलक तालिम मार्फत जनशक्ति परिचालन भई नगरपालिकामा बेरोजगारी न्यूनीकरण र रोजगारी सृजना हुने विश्वास व्यक्त गरे ।

नगर प्रमुख बुढाले  सीप भएका नागरिकहरू देश विकासको मेरुदण्ड हुने उल्लेख गर्दै नगरपालिका भित्रका सबै युवालाई कुनै न कुनै माध्यमबाट व्यावसायिक तालिममा संलग्न गराउने योजना रहेको जानकारी दिए।

कार्यक्रममा प्रमुख प्रशासकीय अधिकृत डील प्रसाद रोकाया, वडा नं. ७ का अध्यक्ष धुर्ब बिक्रम शाही, वडा नं. ८ का अध्यक्ष मनराम ठकुल्ला, नगरपालिकाका सूचना अधिकारी तथा प्रशासन शाखा प्रमुख रत्नबिर कठायत लगायतका अन्य कर्मचारीहरूको उपस्थिति रहेको थियो।

उक्त तालिमले सहभागीहरूलाई व्यावसायिक सीप प्रदान गरी आत्मनिर्भर बन्ने दिशामा टेवा पुर्‍याउने विश्वास गरिएको छ। नगरपालिकाले आगामी दिनहरूमा पनि यस्ता कार्यक्रमहरूलाई प्राथमिकतामा राख्दै निरन्तरता दिने जनाएको छ।