डोल्पा —भेरी करिडोर अन्तर्गत पर्ने डोल्पाको खदाङ–त्रिपुराकोट सडक खण्ड पूर्णरूपमा अवरुद्ध भएको छ ।आज बिहानको अविरल बर्षा सगै डोल्पाको त्रिपुरासुन्दरी नगरपालिका ०६ मा पर्ने चिप्लेभीर र सिउरेनी गरेर दुई स्थानमा पहिरो खसेपछि उक्त सडक खण्ड अवरुद्ध भएको हो ।डोल्पा प्रवेश गर्ने मुख्य करिडोर नै अवरुद्ध भएपछि सवारीसाधन आवतजावत बन्द भएको छ ।

त्रिपुराकोट प्रहरी चौकीको समन्वयमा पहिरो पन्छाउनका लागि एक्स्काभेटर पुगी पहिरो पन्छाउने काम सुरु भइसकेको त्रिपुराकोट प्रहरी चौकीका इन्चार्ज प्रहरी नायब निरीक्षक याम बहादुर बस्नेतले जानकारी दिए।  पहिरो ठूलो गएकाले पन्छाउनका लागि एक्स्काभेटरलाई नै करिब तीन घण्टा लाग्ने अनुमान छ ।

डोल्पा देखि नेपालगञ्ज जाने यात्रुबाहक र मालबाहक ट्रक, मोटरसाइकल लगायतका डोल्पा भित्रिने सबै सवारीसाधन वारपार रोकिएका छन्।

फोटो: त्रिपुराकोट प्रहरी चौकी