पुर्ण सार्की/डोल्पा: संघीय सरकारले हिमाली जिल्ला डोल्पाका विभिन्न स्थानीय तहहरूलाई आगामी आर्थिक वर्ष २०८२/०८३ का लागि झन्डै दुई अर्ब रुपैयाँ बराबरको अन्तरसरकारी वित्तीय अनुदान दिएको छ।

अन्तर सरकारी वित्तीय अनुदान अन्तर्गत संघीय सरकारले संघीय बजेट मार्फत डोल्पाका ८ वटै स्थानीय तहलाई गरी कुल रु १ अर्ब ९९ करोड ६९ लाख रकम विनियोजन गरिएको हो।

८ स्थानीय तहमा आएको अनुदान रकममध्ये सबैभन्दा बढी ठुलिभेरी नगरपालिकाले रु ३७ करोड ८८ लाख प्राप्त गरेको छ भने त्यसपछि त्रिपुरासुन्दरी नगरपालिकालाई रु ३६ करोड ९२ लाख प्रदान गरिएको छ।त्यस्तै,मुड्केचुला गाउँपालिकालाई रु २४ करोड ५४ लाख, जगदुल्ला गाउँपालिकालाई रु २२ करोड ४५ लाख, शे-फोक्सुन्डो गाउँपालिकालाई रु २२ करोड ४१ लाख, काइके गाउँपालिकालाई रु. १९ करोड ६२ लाख, छार्का ताङसोङ गाउँपालिकालाई रु १९ करोड ३४ लाख र सबै भन्दा कम डोल्पो बुद्ध गाउँपालिकालाई रु १६ करोड ५३ लाख अनुदान प्रदान गरिएको छ।

सरकारद्वारा प्रदान गरिने यो अनुदान रकम शिक्षा, स्वास्थ्य, पूर्वाधार विकास, सामाजिक सुरक्षा र अन्य स्थानीय विकासका प्राथमिकतामा खर्च गरिनेछ।

संघीय र प्रदेश सरकारको अनुदान, आन्तरिक आयस्रोत र चालू आर्थिक वर्षमा खर्च हुन नसकेर बचत भएको बजेटलाई समावेश गरेर स्थानीय तहहरुले आगमी असारमा नयाँ आर्थिक वर्षका लागि बजेट सार्वजनिक गर्ने छन्।