पुर्ण सार्की/डोल्पा: डोल्पामा भेरी नदी माथिको झोलुङ्गे पुल देखि हाम फालेर आत्म हत्या गर्न खोज्ने एक युवकको नेपाल प्रहरीले सकुशल उद्धार गरेको छ।

त्रिपुरासुन्दरी नगरपालिका वडा नं १ त्रिपुराकोट बगर बजारमा अवस्थित भेरी नदी माथिको झोलुङ्गे पुल देखि हाम फालेर आत्म हत्या गर्न खोज्ने त्रिपुरासुन्दरी नगरपालिका वडा नं ४ रंगका ३२ वर्षीय युवक धन प्रसाद बुढाको सकुशल उद्धार गरिएको त्रिपुराकोट प्रहरी चौकीका प्रहरी नायब निरीक्षक यम बहादुर बस्नेतले ई- जनचासो लाई जानकारी दिए।

सोमबार साँझ करिब ५ बजे तिर झोलुङ्गे पुलमा झुण्डिएर आत्म हत्या गर्न लागेको भन्ने खबर स्थानीयले त्रिपुराकोट प्रहरी चौकीलाई जानकारी गराए थिए। जानकारी पश्चात त्रिपुराकोट प्रहरी चौकी र स्थानीय बासिन्दाको सहकार्यमा उनलाई उद्धार गरिएको त्रिपुराकोट प्रहरी चौकीले जानकारी दिएको छ।

यद्यपि उनले के कति कारणले आत्म हत्या गर्न खोजेको भन्ने कुरो भने जानकारी दिएका छैनन्।