डोल्पा । हिमाली जिल्ला डोल्पाको खोला किनारमा बेवारिसे शव फेला परेको छ। जिल्लाको काईके गाउँपालिका–५, सिमओडार स्थित खोलाको किनारमा एक पुरुषको वेवारिसे अवस्थामा शव फेला परेको जिल्ला प्रहरी कार्यालय डोल्पाले जानकारी दिएको छ।

प्रहरीका अनुसार अन्दाजी ३८/४० वर्षको माथिल्लो डोल्पाबासी जस्तो देखिने एक वयस्कको शव भिरबाट लडी खोलाको किनारमा घोप्टो अवस्थामा फेला परेको हो ।

काइकेको खानी गाउँका स्थानीय महेन्द्र रोकायले शव फेला पारी इलाका प्रहरी चौकी छार्कामा सूचना दिएका थिए।

उक्त सूचना मार्फत घटनास्थलमा सत्य तथ्य बुझ्न इलाका प्रहरी कार्यालय छार्का र जिल्ला प्रहरी कार्यालयको टोलील घटनास्थलमा पुगेको थियो।

घटनास्थलको आवश्यक प्रक्रिया पूरा गरी शवलाई पोस्टमार्टमको लागि भदौ १४ गते दिउँसो १ बजे जिल्ला अस्पताल डोल्पा ल्याइएको जिल्ला प्रहरी कार्यालय डोल्पाका प्रहरी नायब उपरीक्षक रूक बहादुर खड्काले जानकारी दिए।