डोल्पा । हिमाली जिल्ला डोल्पामा गुडिरहेको ट्रयाक्टरबाट खस्दा एक जना युवक घाइते भएका छन् ।

जिल्लाको त्रिपुरासुन्दरी नगरपालिका-०९ धाउन्नेस्थित भेरीकरीडोर सडकखण्डमा बुधबार राति १ बजे खदाङबाट तारजाली लोड गरी त्रिपुराकोटतर्फ आउँदै गरेको कर्णाली प्रदेश ०२-०५६६ त ००१ नम्बरको ट्रयाक्टरबाट जालीका साहु त्रिपुराकोट नगरपालिका-०२ रुम निवासी २७ वर्षीय निखिल थापा खसेर घाइते भएका थिए ।

उनी निदाएका कारण सन्तुलन गुमाएर एक्कासी ट्रयाक्टरबाट खसेको प्रारम्भिक अनुसन्धानबाट खुलेको प्रहरीले जनाएको छ।

घाइतेलाई तत्काल जिल्ला अस्पताल दुनैमा ल्याई प्राथमिक उपचार गरिएको र थप उपचारका लागि भेरी अस्पताल नेपालगञ्ज रिफर गरिएको प्रहरीले जनाएको छ।

घटनापछि ट्रयाक्टर चालक त्रिपुरासुन्दरी नगरपालिका-०२ रुम निवासी २९ वर्षीय नरेन्द्र थापालाई नियन्त्रणमा लिएको जिल्ला प्रहरी कार्यालयका सूचना अधिकारी पदम रावलले जानकारी दिए । प्रहरीले घटनाबारे थप अनुसन्धान भइरहेको समेत जनाएको छ ।