जाजरकोट । जाजरकोटको शिवालय गाउँपालिकामा बोलेरो जीप दुर्घटना हुँदा छ जना घाइते भएका छन् । सोमबार बिहान करिब  साढे ९ बजे शिवालय गाउँपालिकाबाट छेडातर्फ जाँदै गरेको कर्णाली प्रदेश ०२–००१ च ०३५० नम्बरको बोलेरो जीप थलह–छेडा सडकखण्डको साल्टडामा दुर्घटनामा परेको हो ।

दुर्घटनामा परी जीप चालक शिवालय–८ का २६ वर्षीय हस्त बुढा, भेरी नगरपालिका–१ की ४६ वर्षीया अबिकला राना, शिवालय–३ का ५० वर्षीय पशुपति शर्मा रहेको जिल्ला ट्राफिक प्रहरी कार्यालय जाजरकोटका प्रहरी निरीक्षक नन्दबहादुर बिष्टले रंगीन पाटीलाई जानकारी दिए । उनीहरूको निधार, टाउको, खुट्टा र पेटमा चोट लागेको र अवस्था मध्यम रहेको प्रहरीले जनाएको छ । अन्य तीन जना घाइतेको भने पहिचान खुलेको छैन ।

जीपमा  सवार ९  जना मध्ये तीन जना सकुशल र ६ जना घाइते भएको प्रहरीले जनाएको छ । जीप अनियन्त्रित भई सडकबाट करिब २६ मिटर तल खोलामा खसेको थियो । घाइतेहरूलाई स्थानीयवासीको सहयोगमा उद्धार गरी उपचारका लागि सुर्खेतको सिम्ता गाउँपालिका स्थित जामुने बजार पठाइएको छ । दुर्घटनाको कारणबारे थप अनुसन्धान भइरहेको जिल्ला प्रहरी कार्यालय जाजरकोटले जनाएको छ ।