डोल्पा। हिमाली जिल्ला डोल्पामा अवैध रुपमा नदीजन्य पदार्थ ओसारपसार गर्ने ट्याक्टर नियन्त्रणमा लागिएको छ

। जिल्लाको ठूलीभेरी नगरपालिका-०३ धुपिचौर नजिक ठूली भेरी नदीको किनारबाट अवैध रूपमा नदीजन्य पदार्थ उत्खनन तथा ओसारपसार गर्दै गरेको रा १ त ३४०१ नम्बरको ट्रयाक्टरलाई आइतबार नियन्त्रणमा लिएको जिल्ला प्रहरी कार्यालय डोल्पाले जानकारी दिएको छ ।

प्रहरीले ट्रयाक्टरसँगै चालक दाङको लमही नगरपालिका-०१ सुनडबरी निवासी ३१ वर्षीय राजु चौधरीलाई समेत नियन्त्रणमा लिएको जनाएको छ।

नियन्त्रणमा लिइएको ट्रयाक्टर तथा चालकलाई आवश्यक कानुनी कारबाहीका लागि ठूली भेरी नगरपालिकाको कार्यालय जुफालमा पठाइएको जिल्ला प्रहरी कार्यालय सूचना अधिकारी पदम रावलले जानकारी दिए।

नदीजन्य पदार्थको अवैध उत्खनन तथा ओसारपसार नियन्त्रणका लागि निगरानी र अनुगमनलाई थप प्रभावकारी बनाइने प्रहरीले जनाएको छ।