सल्यान: सल्यानको वनगाड कुपिण्डे नगरपालिका–८ आगानेटा नजिकै शैक्षिक भ्रमणमा रहेका विद्यार्थी बोकेको जीप दुर्घटना हुँदा १० जना घाइते भएका छन्।

वनगाड कुपिण्डे–१२ स्थित गोब्राही प्राथमिक विद्यालय रमखोलाका विद्यार्थीहरू शैक्षिक भ्रमणका लागि शुक्रबार दिउँसो करिब १ बजे आगानेटाबाट कुपिण्डेतर्फ फर्कँदै गर्दा रा.१ ज ८७१ नम्बरको जीप अनियन्त्रित भई भित्री सडक खण्डमा पल्टिएको प्रहरीले जनाएको छ।

जीप दुर्घटनामा सल्यानको वनगाड कुपिण्डे १२का ३८ वर्षीय टोपेन्द्र केसी, सोही स्थानकी ३५ वर्षीय गोमा कुमारी केसी,४ वर्षीय दिपेन्द्र थापा, १९ वर्षीय बिष्णु रोका मगर, ३५ वर्षीय कृष्णा वली , ५ वर्षीय गौरब वली, २५ वर्षीय तेज ब. डाँगी, ४२ वर्षीय निर्मला घर्ती, ३७ वर्षीय ललिता डीसी, दैलेखको डुङ्गेश्वर गाउँपालिकाका २८ वर्षीय देवप्रसाद गौतम घाइतेको भएको जिल्ला प्रहरी कार्यालय सल्यानका प्रहरी नायब उपरीक्षक (डिएसपी) डा. हेमबहादुर केसीले जानकारी दिए ।

जिपमा सवार २० मध्ये घाइते भएका १० जनालाई उपचारका लागि जिल्ला अस्पताल सल्यान पठाइएको छ।

जीप चालक सल्यान कालिमाटी गाउँपालिका–३ फारुलाका २९ वर्षीय प्रकाश घर्तीलाई अस्थायी प्रहरी पोष्ट बाबियाचौरले नियन्त्रणमा लिएको छ। जिप घटनास्थलमै भएको र दुर्घटनाबारे थप अनुसन्धान भइरहेको प्रहरीले जनाएको छ।