सुर्खेत । राष्ट्रिय स्वतन्त्र पार्टी (रास्वपा)ले गत फागुन २१को चुनावमा आफ्नो पार्टीले प्रत्यक्षतर्फ निर्वाचन जित्न नसकेको क्षेत्रमा समानुपातिक सांसदलाई जिम्मेवारी दिएको छ ।

आइतबार रास्वपाको केन्द्रीय सचिवालय बैठकले प्रतक्ष्य निर्वाचित सांसदहरू नभएका क्षेत्रमा समानुपातिक सांसदलाई जिम्मेवारी तोक्ने निर्णय गरेको थियो ।

सोही अनुसार आज मंगलबार प्रतक्ष्य निर्वाचित सांसद नभएका क्षेत्रमा जिम्मेवारी तोकेको रास्वपाका महामन्त्री कविन्द्र बुर्लाकोटीले जानकारी दिए ।

रास्वपाका अनुसार कर्णालीका ११ निर्वाचन क्षेत्र सहित जित्न सकेको देशभरका ४० निर्वाचन क्षेत्रको लागि समानुपातिक सांसदलाई जिम्मेवारी तोकेको छ ।

महामन्त्री बुर्लाकोटीका अनुसार डोल्पाको जिम्मेवारी समानुपातिक सांसद विधुषी राणालाई दिइएको छ । त्यस्तै सुर्खेत निर्वाचन क्षेत्र १ मा अमृता विक, जाजरकोटमा प्रभा ढकाल, कालीकोटमा ज्ञानु पौड्याल, जुम्लामा समिना मिया , दैलेख-१ मा कुसुम महर्जन र दैलेख-२ मा श्रद्धा कुवर क्षत्री, मुगुमा खगेन्द्र कर्ण , रुकुम पश्चिममा सुरेन्द्र चौधरी, सल्यानमा खिमा विक, हुम्लामा सरिता महतोलाई जिम्मेवारी दिइएको छ ।

रास्वपाले फागुन २१ गते सम्पन्न भएको प्रतिनिधि सभा निर्वाचनमा सुर्खेत-२ बाहेक कर्णालीका सबै निर्वाचन क्षेत्रमा पराजय भोगेका थियो ।

निर्वाचन क्षेत्रको समस्या र मागहरू सहजै सम्बोधन गर्ने उद्देश्यले पराजय भोगेका क्षेत्रमा रास्वपाले जिम्मेवारी तोकेको जनाएको छ।