कर्णाली स्वास्थ्य विज्ञान प्रतिष्ठानमा स्वास्थ्यकर्मीमाथि भएको अभद्र व्यवहारपछि अवरुद्ध सेवा पुनः सञ्चालनमा आएको छ।

युवा अभियन्ता भनेर चिनिएका उपेन्द्र बुढथापा र नरेन्द्र बुढथापाले चिकित्सकहरूसँग माफी माग्दै आगामी दिनमा यस्तो व्यवहार नदोहोर्‍याउने लिखित प्रतिबद्धता जनाएपछि सेवा नियमित भएको हो।

बुधबार ड्युटीमा रहेका स्वास्थ्यकर्मीमाथि दुर्व्यवहार र धम्की दिइएको घटनापछि सुरक्षाको माग गर्दै स्वास्थ्यकर्मीहरूले बिहीबार बिहानदेखि आकस्मिकबाहेकका सबै सेवा ठप्प पारेका थिए।

प्रतिष्ठानका रजिष्ट्रार एवं प्रवक्ता लक्ष्मीचन्द्र महतका अनुसार दुर्व्यवहारमा संलग्न युवाहरूले आफ्नो गल्ती स्वीकार गर्दै माफी मागेपछि दुवै पक्षबीच सहमति भएको हो।

“उहाँहरूले अबदेखि यस्तो व्यवहार नगर्ने प्रतिबद्धता जनाउनुभयो, र पीडित पक्षले पनि विषयलाई धेरै नचर्काउने भन्दै सहमति जनायो,” महतले बताए।

घटनापछि केही समय प्रतिष्ठानको वातावरण तनावपूर्ण बनेको थियो। सामाजिक अभियन्ताको नाममा केही युवाहरूले विभिन्न विभागमा पुगेर स्वास्थ्यकर्मीलाई गालीगलौज र धम्की दिएको बताइएको छ।

सेवा अवरुद्ध भएपछि बिहान १० बजेदेखि वार्ता सुरु गरिएको थियो। वार्तामा उपकुलपति डा. पुजन रोकाया, डीन डा. प्रेनित पोखरेल, रजिष्ट्रार महत तथा विवेक पुन मगर लगायतको टोलीले सहजीकरण गरेका थिए। सहमति पश्चात् प्रतिष्ठानका सम्पूर्ण सेवा पुनः सुचारु भएको छ।