डोल्पा। हिमाली जिल्ला डोल्पाको शे- फोक्सुण्डो गाउँपालिकाद्वारा पालिका भित्र सडक र इन्टरनेटको समस्या समाधानको लागि प्रदेश सरकारसंग पहल गरिएको छ ।

शे-फोक्सुण्डो गाउँपालिकाका अध्यक्ष धावा सम्डुक गुरुङको नेतृत्वमा गएको टोलीले शुक्रबार कर्णाली प्रदेशका मुख्यमन्त्री र भौतिक पूर्वाधार तथा शहरी विकास मन्त्री शेरबहादुर बुढासँग पालिका भित्र सडक निर्माण र नेटवर्क विस्तारको लागि आवश्यक सहयोग र समन्वयको आग्रह गरेको हो ।

अध्यक्ष गुरुङका अनुसार भेटका क्रममा पालिकाको सिङथुप्रा-रिखे-पुग्मो हुँदै दुनै जोड्ने महत्वपूर्ण सडक योजनाका लागि चालु आर्थिक वर्ष २०८२/०८३ मा बजेट सुनिश्चित हुन नसकेको जानकारी गराउँदै आगामी आर्थिक वर्ष २०८३/०८४ मा बहुवर्षीय योजनाका रूपमा समावेश गरी बजेट व्यवस्था गर्न अनुरोध गरिएको छ।
उक्त सडक निर्माण भएमा गाउँपालिका केन्द्र र जिल्ला सदरमुकामबीचको दूरी घट्ने, यातायात पहुँच विस्तार हुने तथा पर्यटन विकासमा समेत टेवा पुग्ने अध्यक्ष गुरूङले बताए ।
गाउँपालिकाले यसअघि नै सडक सञ्जाल अभावका कारण सेवा प्रवाह, स्वास्थ्य सेवा, विपद् व्यवस्थापन र आर्थिक गतिविधिमा असर परेको उल्लेख गर्दै योजना अघि बढाउन सरकारलाई आग्रह गर्दै आएको थियो। योजनाको प्रारम्भिक खण्डको विस्तृत परियोजना प्रतिवेदन (डीपीआर) समेत तयार भइसकेको पालिकाले जनाएको छ।

यसैगरी, गाउँपालिकाका माथिल्ला सात वडामा विगत करिब ६ महिनादेखि इन्टरनेट सेवा अवरुद्ध रहेको विषय पनि उठाइएको छ।
वर्ल्डलिङ्क कम्युनिकेशनमार्फत सञ्चालित इन्टरनेटसेवा प्रभावकारी रूपमा सञ्चालन हुन नसक्दा अनलाइन सेवा, शिक्षा तथा प्रशासनिक कामकाज प्रभावित बनेको गाउँपालिकाको भनाइ छ। सेवा प्रदायकसँग पटक–पटक समन्वय गर्दा पनि समस्या समाधान नभएपछि प्रदेश सरकारसंग सहयोग माग्नु परेको अध्यक्ष गुरूङको जानकारी दिए ।

भेटमा मुख्यमन्त्री यामलाल कडेलले प्रमुख सचिवमार्फत आवश्यक पहल गरी समस्या समाधानका लागि समन्वय गर्ने आश्वासन दिएका छन्।
गाउँपालिकाले सडक र इन्टरनेट दुवैको समस्या समाधान भएमा स्थानीय नागरिकको जीवनस्तर सुधार हुने देखि सेवा प्रवाह थप प्रभावकारी बन्ने बताएको छ ।