पूर्ण सार्की/ डोल्पा। डोल्पाको जगदुल्ला गाउँपालिकाको कुच्चे घट्टे खोला लघुजलविद्युत तीन महिनापछि सञ्चालनमा आएको छ ।

गत फागुन ९ गते विद्युतका मेसिन जलेर पूर्ण रूपमा अवरुद्ध भएको लघु जलविद्युत आयोजना तीन महिनापछि शुक्रबारदेखि सञ्चालनमा आएको जगदुल्ला गाउँपालिकाले जानकारी दिएको छ ।

पालिकाका अनुसार विद्युतको जेनेरेटर, टर्बाइन, ट्रान्सफर लगाएतका मेसिन जलेर नष्ट हुँदा पालिकाको ४,५,६ नम्बर वडाका झण्डै ४०० घरधुरी तीन महिना देखि अन्धकारमा बस्न बाध्य थिए । अहिले पालिकाले झण्डै २० लाख लागतमा विद्युतको जलेका सामग्रीको पाटपुर्जा ल्याई मर्मत गरेपछि पुनः सुचारु भएको पालिकाका प्रमुख प्रशासकीय अधिकृत भक्त बहादुर पाण्डेले जानकारी दिए ।

उनका अनुसार विद्युत अवरुद्ध हुँदा पालिका भित्र रहेको टेलिकमको टावर समेत अवरुद्ध भएको थियो । जसका कारण गाउँपालिकाको सेवा प्रवाहमा समस्या भै अनलाइन सेवाबाट हुने सबै सेवा प्रवाहमा समेत प्रभावित भएको उनले बताए ।

पालिका अनुसार गाउँमा विद्युत अवरुद्ध हुँदा नेपाल टेलिकमको टावरमा रहेको सोलार ब्याट्रीले काम नगरेको कारण दैनिक टावर अवरुद्ध हुने गरेको थियो । टावर अबरुद्ध भई असहज भएपछि अहिले पालिकाले आफै टावरसम्म बिजुली विस्तार गरेको समेत प्रमुख प्रशासकीय अधिकृत पाण्डेले बताए ।