डोल्पा । हिमाली जिल्ला डोल्पामा १९औँ गणतन्त्र दिवस विभिन्न कार्यक्रम गरी मनाइएको छ। दिवसको अवसर पारेर
जिल्ला समन्वय समितिको आयोजनामा सदरमुकाम दुनैमा प्रभातफेरीसँगै जिल्ला अस्पतालमा उपचाररत बिरामीलाई फलफूल तथा जिल्ला कारागारमा रहेका कैदीबन्दीलाई खेलकुद सामग्री वितरण गरिएको छ ।

बिरामीलाई वितरण गरिएको फलफूल सामाजिक विकास कार्यालय डोल्पाले सहयोग गरेको थियो भने कैदीबन्दीका लागि आवश्यक खेलकुद सामग्री दुनै भ्याली क्लबले उपलब्ध गराएको जनाएको छ।

कार्यक्रमको समापनमा बोल्दै जिल्ला समन्वय समितिका प्रमुख रोकायाले गणतन्त्र स्थापनाका लागि जीवन उत्सर्ग गर्ने सहिदहरूप्रति श्रद्धाञ्जली व्यक्त गर्दै गणतन्त्रको रक्षा र जनताले अनुभूति गर्ने गरी यसको कार्यान्वयनमा सबै लाग्नुपर्नेमा जोड दिए।

उनले अहिलेको व्यवस्था र सरकार पनि गणतन्त्रकै उपज भएकाले जनताको पक्षमा उभिएर काम गर्नुपर्ने तथा नागरिकले वास्तविक रूपमा सरकारको अनुभूति गर्न सक्ने वातावरण बनाउन आवश्यक रहेको बताए।

कार्यक्रममा समन्वय प्रमुख रोकायासँगै प्रमुख जिल्ला अधिकारी जुनु हमाल ढकाल, नेकपा एमालेका जिल्ला अध्यक्ष लंक बहादुर रोकाया, ठुली भेरी-०३ का वडा अध्यक्ष भक्त बहादुर भण्डारी लगायत विभिन्न राजनीतिक दलका प्रतिनिधि तथा स्थानीय जनप्रतिनिधिको सहभागिता रहेको थियो।