डोल्पा। हिमाली जिल्ला डोल्पामा लुकीछिपी यार्सागुम्बा चोर्न जाने ८ जना पक्राउ परेका छन् ।

जिल्लाका विभिन्न यार्सा पाटनहरूमा यार्सागुम्बा चोर्न जाँदै गरेका ८ जनालाई नियन्त्रणमा लिएको शे-फोक्सुण्डो राष्ट्रिय निकुञ्जको कार्यालयले जानकारी दिएको छ ।

कार्यालयका अनुसार आइतबार बिहान जिल्लाको शे-फोक्सुण्डो गाउँपालिका स्थित कोनास यार्सा पाटनमा लुकीछिपी यार्सागुम्बा चोर्न जाँदै गरेका जुम्लाको पातारासी गाउँपालिकाका ६ जनालाई निकुञ्जको सुन्धुवा स्थित निकुञ्ज र नेपाली सेनाको संयुक्त सुरक्षा पोष्टले पक्राउ गरेको हो । पक्राउ परेकाहरुलाई निकुञ्जको कार्यालय तर्फ ल्याउँदै गरेको निकुञ्जका सूचना अधिकारी विज्ञान सेनले रंगिन पाटीलाई जानकारी दिए ।

त्यस्तै गत वैशाख ११ गते शुक्रबार जगदुल्ला गाउँपालिकास्थित फूलबारी यार्सा पाटनबाट तोइजुम स्थित निकुञ्ज र नेपाली सेनाको संयुक्त सुरक्षा पोष्टले जगदुल्ला गाउँपालिका ५ का दुई जनालाई पक्राउ गरिएको निकुञ्जले जानकारी दिएको छ ।

पक्राउ परेका उनीहरूलाई दुई दिन नियन्त्रणमा राखेर बयान लगि हाजिरी जमानीमा छोडिएको निकुञ्जका सूचना अधिकारी विज्ञान सेनले बताए ।

यार्सागुम्बा संकलनको समय नजिकिँदै गर्दा डोल्पाका यार्सापाटनहरुमा सुरक्षा बढाइएको छ । यो वर्ष यार्सागुम्बा संकलनका लागि जिल्लाका यार्सापाटनहरु कहिले खुलाउने भन्ने विषयमा सर्वदलीय, सर्वपक्षीय बैठक यही वैशाख २२ गते मंगलबार बोलाइएको छ ।

निकुञ्जले यार्सापाटनहरु आधिकारिक रूपमा नखुल्दै कोही कसैलाई चोरीको लागी पाटनतिर नजान आग्रह समेत गरेको छ ।