डोल्पा । हिमाली जिल्ला डोल्पामा यात्रुवाहक जिप दुर्घटना हुँदा ९ जना घाइते भएका छन्। जिल्लाको ठूलीभेरी नगरपालिका-०९ भित्तीस्थित भेरी करिडोर सडकखण्डमा शनिबार साँझ करिब ६ः३० बजे ग १ ज ६४३७ नम्बरको यात्रुवाहक जिप दुर्घटना हुँदा ९ जना घाइते भएको जिल्ला प्रहरी कार्यालय डोल्पाले जनाएको छ।

प्रहरीका अनुसार सदरमुकाम दुनैबाट त्रिपुराकोटतर्फ जाँदै गरेको जिप एक्कासी ब्रेक फेल भएपछि विपरीत दिशाबाट आउँदै गरेको रा १ च २९४८ नम्बरको ट्याक्टरसँग ठोक्किएको थियो।

दुर्घटनामा जिपमा सवार चालकसहित १० जनामध्ये ९ जना घाइते भएका छन्। घाइतेहरूको नाम, थर तथा स्वास्थ्य अवस्था खुल्न बाँकी रहेको र घाइतेहरुलाई उपचारका लागि जिल्ला अस्पताल दुनै पठाइएको जिल्ला प्रहरी कार्यालयका सूचना अधिकारी पदम रावलले जानकारी दिए ।

रावलका अनुसार दुघर्टनापछि सम्बन्धित ठाउँमा प्रहरी पुगी जीप चालक ठुली भेरी नगरपालिका-०९ बस्ने ३१ वर्षीय राजकुमार सिंह र ट्याक्टर चालक ठुली भेरी नगरपालिका-०४ बस्ने २३ वर्षीय दिल बहादुर विकलाई प्रहरीले नियन्त्रणमा लिएको छ भने दुर्घटनाग्रस्त जिप र ट्याक्टर घटनास्थलमै रहेका छन्। दुर्घटनाका कारण सडक अवरुद्ध नभएको घटनाबारे थप अनुसन्धान भइरहेको जिल्ला प्रहरी कार्यालय डोल्पाले जनाएको छ।