डोल्पा: यार्सागुम्बा संकलनका लागि हिमाली जिल्ला डोल्पा पुगेका दुई समूहबीच झडप भएको छ।शनिबार दिउँसो ठूली भेरी नगरपालिका – १ को ठांगे लेक( दह देउराली)मा यार्सागुम्बा संकलन गर्न गएका २ समूहबीच झडप भएको हो।

जिल्ला प्रहरी कार्यालय डोल्पाका प्रहरी निरीक्षक मनिश थापाका अनुसार डोल्पाको ठूली भेरी नगरपालिका ०१ थालाका र काइके गाउँपालिका ०२ माथिल्लो शहरताराका स्थानीयहरुबिच झडप भएको हो।  यार्सा सङ्कलनको लागि डोल्पा पुगेका पूर्वी रुकुमको मैकोट गाउँका स्थानीय पनि झगडामा सामेल भएको बताइएको छ।

उनीहरूबीच यार्सागुम्बा संकलनमा सीमा इलाकाको विषयमा विवाद भई झडप भएको थियो। दुवै पक्षका गरी अन्दाजी ७ सय मानिसहरू रहेको प्रहरी निरीक्षक थापाले जानकारी दिए।

यो दुई ठाउँका स्थानीय बीच विगत लामो समय देखि सीमा विवाद चलिरहेको छ। ठांगे यार्सा पाटनलाई दुवै ठाउँका सामुदायहरुले एक अर्काको दाबी गर्दै आइरहेका छन्। अरु बेला खासै सीमा विवाद नआएपनि यार्सा सङ्कलनको समयमा भने विवाद हुँदै आइरहेको छ।

दुवै ठाउँका स्थानीय बीच ढुङ्गा मुढा, गाली गलौज भै स्थितिलाई नियन्त्रणमा लिन सशस्त्र प्रहरी बल नेपाल नं.४६ गुल्म डोल्पाबाट सशस्त्र प्रहरी नायब निरीक्षकको कमाण्डमा खटिएको टोलीले २ राउन्ड हवाइ फायर गरेको शसस्त्र प्रहरी बल नेपाल नं ४६का डिएसपी भुवन अर्यालले जानकारी दिए। अहिले त्यहाँको अवस्था सामान्य रहेको उनले बताए।