पूर्ण सार्की: हिमाली जिल्ला डोल्पाको तत्कालीन दुनै गाविस वडा नं. २ र ३ मा अस्तित्वमै नरहेको विद्यालय देखाएर सरकारी रकम हिनामिना गरेको आरोपमा चारजनाविरुद्ध विशेष अदालत काठमाडौंमा भ्रष्टाचार मुद्दा दायर गरिएको छ।

अख्तियार दुरुपयोग अनुसन्धान आयोगले दिएको जानकारीअनुसार, उक्त ठाउँमा ‘दुर्गा प्राथमिक विद्यालय, तिप्ला’ नामक विद्यालय अस्तित्वमै नरहे पनि सोही नाममा २ कोठे विद्यालय भवन निर्माणको योजना पारेर रु. ७ लाख ६० हजार रकम हिनामिना गरिएको पुष्टि भएको छ।

आयोगको अनुसन्धानका क्रममा हालको डोल्पा जिल्ला ठूलीभेरी नगरपालिका वडा नं. ४ (साविक दुनै गाविस वडा नं. २ र ३) मा ‘दुर्गा प्रा.वि.’ नामको कुनै विद्यालय सञ्चालनमा नरहेको, र त्यहाँ केवल ‘श्री लालिगुँरास आधारभूत विद्यालय’ मात्र रहेको पुष्टि भएको छ। त्यसैगरी, सो क्षेत्रका लागि शान्ति तथा पुनर्निर्माण मन्त्रालयबाट कुनै पनि रकम विनियोजन नभएको र विद्यालय भवनसमेत नबनेको जिल्ला शिक्षा कार्यालय, डोल्पाको पत्र तथा अख्तियारको प्राविधिक टोलीको स्थलगत निरीक्षणबाट पुष्टि भएको आयोगले जानकारी दिएको छ।

अनुसन्धानका आधारमा अख्तियारले जिल्ला प्राविधिक कार्यालय, दुनै डोल्पाका तत्कालीन कार्यालय प्रमुख ईन्जिनियर रविचन्द्र पजियार, लेखापाल मनिराम कुर्मी, उपभोक्ता समितिका अध्यक्ष नन्दसिंह बुढा र कोषाध्यक्ष संगिता बुढालाई योजनाबद्ध ढंगले झुट्टा कागजात तयार गरी काल्पनिक उपभोक्ता समिति गठन गरेर भ्रष्टाचार गरेको ठहर गर्दै विशेष अदालतमा मुद्दा दायर गरेको हो।

उनीहरूले आपसी मिलेमतोमा दुर्गा प्रा.वि.का लागि भवन बनेको देखाएर नक्कली कागजात तयार पारेर चेकमार्फत रु. ७,६०,००० रकम भुक्तानी लिएको अख्तियारको दाबी छ।

चारै जनाविरुद्ध जनही ७ लाख ६० हजार रुपैयाँ बराबरको बिगो माग गर्दै अख्तियारले विशेष अदालतमा मुद्दा दायर गरेको हो।