पूर्ण सार्की/ डोल्पा : हिमाली जिल्ला डोल्पाको ठूलीभेरी नगरपालिका–३ धुपिचौरस्थित ठूलीभेरी नदीको टापुमा फसेका चार जना युवालाई मंगलबार बिहान सकुशल उद्धार गरिएको छ।
केही दिन देखिको अविरल वर्षाका कारण नदीमा पानीको बहाव एक्कासि बढ्दा बाढीले बगाएको दाउरा संकलन गर्न गएका उनीहरू टापुमा फसेका थिए।
फोटो: टेक शाहि
जिल्ला स्थित सबै सुरक्षा निकायको सहकार्यमा भेरी नदीको टापुमा फसेका त्रिपुरासुन्दरी ६ का ३३ वर्षीय ललित बोहोरा,२६ वर्षीय नन्द प्रसाद बोहोरा, ३७ वर्षीय श्यामलाल बोहोरा र ३५ वर्षीय लालकुमार बुढाको उद्दार गरिएको जिल्ला प्रहरी कार्यालय डोल्पाका प्रहरी नायब उपरीक्षक रूक बहादुर खड्काले जानकारी दिए।
उनीहरूलाई उद्दार गर्न प्रहरी नायव उपरीक्षक खड्काको कमाण्डमा २५ जना प्रहरीको टोली, सशस्त्र प्रहरी बल गुल्म नम्बर ४६ दुनैबाट सशस्त्र प्रहरी नायव उपरीक्षक दीपकराज भट्टको कमाण्डमा १९ जना र नेपाली सेनाको संग्राम सार्दुल गुल्म, सुलिगाड डोल्पाबाट सेनानी हरिश शाहीको कमाण्डमा २२ जना सुरक्षाकर्मी खटिएका थिए।
फोटो: टेक शाहि
उद्दार पश्चात उनीहरुलाई जिल्ला अस्पताल डोल्पा पठाइएको थियो। अस्पतालका अनुसार उनीहरूको स्वास्थ्य अवस्था सामान्य रहेको र उपचार पश्चात उनीहरुलाई घर पठाइएको छ।
जिल्ला प्रशासन कार्यालय डोल्पाले वर्षायाममा नदी आसपास दाउरा संकलन वा अन्य कामका लागि जानु जोखिमपूर्ण हुने हुँदा सावधानी अपनाउन सबैलाई अनुरोध समेत गरेको छ।
प्रतिक्रिया
सम्बन्धित खवर
असार ६, २०८३ शनिबार 11 Views
असार ४, २०८३ बिहिबार 102 Views
