सुर्खेत, साउन २९– कर्णाली प्रदेश सरकारले विपन्न, असहाय र बेवारिसे नागरिकलाई अस्पताल पुग्न वा फर्किन यातायात खर्च उपलब्ध गराउने भएको छ। सामाजिक विकास मन्त्रालयले आर्थिक वर्ष २०८२/८३ का लागि २५ लाख रुपैयाँ बजेट विनियोजन गर्दै भौगोलिक दूरीअनुसार ५ हजारदेखि २० हजारसम्म उपचार वा यातायात खर्च दिने व्यवस्था गरेको हो।

मन्त्री घनश्याम भण्डारीका अनुसार, अस्पतालमा पुग्न नसक्ने वा फर्किन नसक्ने बिरामीलाई स्वास्थ्य सेवाको पहुँचमा अभिवृद्धि गर्नु यस कार्यक्रमको मुख्य उद्देश्य हो। सेवाग्राहीले वडाको सिफारिस वा अस्पतालको प्रमाणसहित मन्त्रालयमा निवेदन दिनुपर्नेछ। निवेदनका साथ बिरामीको पुर्जा, आफन्तको बैंक खाता विवरण, मृतकको हकमा मृत्युदर्ता प्रमाणपत्र र हकवालाको बैंक विवरण पेश गर्नुपर्नेछ।

त्रिपुरासुन्दरी नगरपालिकाको अनुरोध

यस्तै, उपचारका क्रममा मृत्यु भई आर्थिक अभावमा धार्मिक संस्कार गर्न नसक्नेका लागि शव वाहन खर्च पनि भुक्तानी गरिनेछ। भुक्तानीका लागि मन्त्रालयका सचिवको नेतृत्वमा स्वास्थ्य महाशाखा प्रमुख, आर्थिक प्रशासन शाखा प्रमुख, र चिकित्सा शाखा प्रमुख सदस्य रहने समिति गठन गरिएको छ।

मन्त्री भण्डारीले संघीय सरकारले दीर्घ रोगीलाई दिँदै आएको रकम भन्दा थप एक लाख रुपैयाँ उपचार खर्च प्रदेश सरकारले दिने बताउँदै प्रदेश अस्पतालमा मृगौलाको डायलाइसिस निशुल्क गर्ने व्यवस्था पनि मिलाइएको जानकारी दिए।