काठमाडौं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईमाथि अनुसन्धान हुनुपर्ने माग गर्दै अख्तियारमै उजुरी दर्ता भएको छ ।

सिन्धुलीका कमलामाई नगरपालिकाका युवराज पौडेलले राईमाथि अनुसन्धान गर्नुपर्ने माग गर्दै अख्तियारको कार्यालयमा उजुरी दर्ता गरेका हुन् । राईविरुद्धको उजुरी ‘सी–००३४९८’ नम्बरमा दर्ता भएको हो ।

पौडेलले राईमाथि वाइडबडी विमान खरिद अनियमितता, नेपाल आयल निगमको जग्गा खरिद अनियमितता र नक्कली भुटानी शरणार्थी प्रकरणका आरोपितहरुले राईको गाडीमा पैसा हालिदिएको विषयमा छानविन गरी कारबाहीको माग गरेका छन।

विशेष अदालतले गत हप्ता वाइडबडी विमान खरिद भ्रष्टाचार मुद्दाको पूर्णपाठमा दूषित काम कारबाहीको शुरुवाती निर्णयकर्तामाथि नै अनुसन्धान नभएको, मुद्दा चलाउने क्रममा केहीलाई छान्ने र केहीलाई छाड्ने गरी चयनपूर्ण अभियोजन भएको भनेर न्यायिक टिप्पणी गरेको थियो ।