सुर्खेत। हिजो र अस्तिको तुलनामा आज शनिबार देशभर वर्षा हुने क्रम केही घट्ने मौसमविद्ले अनुमान गरेका छन्। मौसम पूर्वानुमान महाशाखाले आज बिहान ६ बजे सार्वजनिक गरेको २४ घण्टे बुलेटिन अनुसार देशभर मौसम साधारणतया बदली रहनेछ।

दिउँसो कर्णाली र सुदूरपश्चिम प्रदेशका तराई र पहाडी भूभागका केही स्थानहरूमा, बागमती र गण्डकी प्रदेश लगायत बाँकी पहाड क्षेत्रका थोरै स्थानहरूमा तथा तराईका एकदुई स्थानमा मध्यम वर्षा हुने सम्भावना रहेको महाशाखाले जनाएको छ।

रातिको समयमा पनि देशभर बदली हुने र सबै प्रदेशका पहाडी भूभागका केही स्थान तथा तराईका थोरै स्थानहरूमा मध्यम वर्षा हुन सक्ने अनुमान गरिएको छ।

हाल मनसुनको न्यून चापीय रेखा पूर्वमा सरदर स्थानभन्दा केही दक्षिणतर्फ र पश्चिममा सरदर स्थान आसपास सक्रिय रहेको जानकारी दिइएको छ।

महाशाखाका अनुसार २४ घण्टाभित्र १० देखि ५० मिलिमिटर वर्षा भएको खण्डमा त्यसलाई मध्यम वर्षा मानिन्छ। यस्तै, वर्षा हुने स्थानहरूको प्रतिशत अनुसार एकदुई स्थान,थोरै स्थान,केही स्थान,धेरै स्थान र अधिकांश स्थान भनेर वर्गीकृत गरिन्छ।

सम्बन्धित क्षेत्रका नागरिकलाई आवश्यक सतर्कता अपनाउन मौसमविद्‌हरूले सुझाव दिएका छन्।