सुर्खेत : सामाजिक सञ्जालमार्फत विभिन्न पुरुषलाई झुक्याई नक्कली विवाह गराइ ठगी गर्ने दुई जनालाई प्रहरीले पक्राउ गरेको छ।

जिल्ला प्रहरी कार्यालय सुर्खेतका अनुसार फेसबुकलगायतका सामाजिक सञ्जालमार्फत कुरा गरेर नक्कली आमा, बुबा र छोरी बनेर पुरुषहरूलाई विवाह गर्ने बहानामा नगद तथा गरगहना ठगी गर्ने समूहविरुद्ध परेको उजुरीका आधारमा उनीहरूलाई पक्राउ गरिएको हो।

पक्राउ पर्नेमा दैलेखका घर भई हाल सुर्खेत वीरेन्द्रनगर १० बस्ने ४० वर्षीय होटेल सदाशंकरका सञ्चालक गोपाल कुमार विक, अछामको तुर्माखाद गाउँपालिका ३ घर भई हाल वीरेन्द्रनगर १० बस्ने ३८ वर्षीय भविसरा रास्कोटी मगर रहेको जिल्ला प्रहरी कार्यालय सुर्खेतका प्रहरी नायब उपरीक्षक मोहनजंग बुढथापाले जानकारी दिए।

यो समूहले एउटै महिलालाई फरक–फरक मितिमा विभिन्न पुरुषसँग नक्कली विवाह गराएर नगद र गरगहना ठगी गर्दै आएको अनुसन्धानबाट खुलेको छ।

पीडितहरूले प्रहरीमा दिएको जाहेरीका आधारमा पक्राउ परेका दुबै जनामाथि अपराधिक लाभ तथा ठगी सम्बन्धी कसुरमा म्याद थप गरी आवश्यक अनुसन्धान भइरहेको प्रहरीले जनाएको छ।