डोल्पा:  जिल्ला प्रशासन कार्यालय डोल्पाले  जिल्लाको सदरमुकाम दुनै बजार क्षेत्रमा भेला, जुलुस, प्रदर्शन, सभा, बैठकलगायतका कार्यक्रम निषेध गरेको छ ।

प्रशासनले   विज्ञप्ति जारी गर्दै मंगलबार साझ १० बजेदेखि अर्को आदेश नभएसम्मका लागि सदरमुकाम दुनैमा निषेधाज्ञा लागू गरेको हो।

प्रशासनले शान्ति सुरक्षा भंग हुने आशंका देखिएकाले स्थानीय प्रशासन ऐन, २०२८ को दफा ६ बमोजिम निषेधाज्ञा आदेश जारी गरेको जनाएको छ।

सदरमुकाम दुनै स्थित पूर्वमा सशस्त्र प्रहरी बल नं. ४६ गुल्म हे.क्वा , पश्चिममा धुपिचौर उत्तर माथिल्लो दुनै, दक्षिण जिल्ला अस्पताल, भित्रको क्षेत्रमा निषेधाज्ञा लागू गरिएको हो।

निषेधाज्ञा अवधिभर कुनै पनि किसिमका भेला, जुलुस, प्रदर्शन, सभा, बैठक, धर्ना तथा विरोधका कार्यक्रम गर्न प्रतिबन्ध गरिएको प्रशासनले जनाएको छ। आदेश उल्लंघन गर्नेहरूलाई कानुनअनुसार कारबाही हुने चेतावनीसमेत दिएको छ।