पूर्ण सार्की/सुर्खेत। सुर्खेतको भेरीगंगा नगरपालिका–५ एमालेमोड नजिक सुर्खेत–नेपालगञ्ज सडक खण्डमा भएको सवारी दुर्घटनामा ६ जना घाइते भएका छन्।
मंगलबार दिउँसो करिब १:४५ बजे नेपालगञ्जबाट सुर्खेततर्फ आउँदै गरेको भे१ प १६८५ नं को मिनि ट्रक र सुर्खेतबाट नेपालगञ्जतर्फ जाँदै गरेको क.प्र.०२–००१ ख ०९२२ नं को फोर्स गाडी एकआपसमा ठोक्किँदा फोर्स गाडीका चालकसहित ६ जना घाइते भएका हुन्।

प्रहरी चौकी बबईका प्र.स.नि. हरी बहादुर तिरुवाको कमाण्डमा ट्राफिकसहितको पाँच जनाको टोलीले उद्धार गरी घाइतेहरुलाई उपचारका लागि कोहलपुर पठाइएको इलाका प्रहरी कार्यालय बबईले जानकारी दिएको छ। घाइतेहरुको विवरण भने खुल्न बाँकी रहेको प्रहरीले जनाएको छ। प्रहरीका अनुसार दुर्घटनामा संलग्न मिनि ट्रक र चालकलाई प्रहरीले नियन्त्रणमा लिएको र सडकमा भने कुनै अवरोध नभएको प्रहरीले जनाएको छ।