पूर्ण सार्की/ डोल्पा: हिमाली जिल्ला डोल्पाको मुड्केचुला गाउँपालिकामा विगत एक महिनादेखि टेलिफोन सेवा अवरुद्ध भएको छ।

रुकुम पश्चिमको आठबिसकोट नगरपालिकाको गोतामकोटबाट रिले भएर सञ्चालन हुँदै आएको मुड्केचुलामा टेलिफोन सेवा बन्द भएपछि एक महिना देखि सिंगो गाउँपालिका नै संचार सुविधाबाट बञ्चित हुँदै आएको हो।

शुक्रबार गाउँपालिकाले जिल्ला प्रशासन कार्यालय डोल्पामा पत्र पठाई सम्बन्धित निकायलाई तत्काल सेवा सुचारु गर्न आग्रह गरेको छ ।

महिनौ देखि टेलिफोनको सेवा बन्द भएको भनी नेपाल टेलिकम डोल्पा र सुर्खेत कार्यालयसँग पटक–पटक सम्पर्क गर्दा पनि समस्या समाधान नभएको गाउँपालिकाका अध्यक्ष दत्त बहादुर शाहीले जानकारी दिए।

गाउँपालिकाले डोल्पा प्रशासनलाई जिल्ला प्रशासन कार्यालय रुकुम पश्चिमसँग आवश्यक सहजीकरण गर्न अनुरोध गर्दै दशैँअघि नै सेवा सुरु हुने व्यवस्था मिलाइदिन पत्र मार्फत माग गरेको छ।

साथै पालिकाले जुम्ला जिल्लाको मौरे लेखस्थित रिले टावरलाई मुड्केचुला–५ पातीहाल्नमा रहेको टावरसँग जडान गरी दीर्घकालीन रूपमा सेवा प्रवाह गर्न पनि सम्बन्धित निकायलाई आग्रह समेत गरेको छ।