डोल्पा। डोल्पाको त्रिपुरासुन्दरीमा मोटरसाइकल दुर्घटना हुँदा दुई जना घाइते भएका छन्।त्रिपुरासुन्दरीको त्रिपुराकोट बगर बजारस्थित गल्लीगाड खोलामा रहेको कल्वट पुल नजिकै मंगलबार बिहान करिब ९:२० बजेको समयमा सदरमुकाम दुनैबाट त्रिपुरासुन्दरी मन्दिरतर्फ जाँदै गरेको क १ प्र १२१८ नम्बरको मोटरसाइकल घुम्तीमा अनियन्त्रित भई पल्टिँदा दुई जना घाइते भएको जिल्ला प्रहरी कार्यालय डोल्पाले जानकारी दिएको छ ।

मोटरसाइकल घुम्तीमा अनियन्त्रित भई पल्टिँदा ठुलिभेरी नगरपालिका–४ तिप्ला निवासी करिब ३५ वर्षीयचालक नेत्र रोकाय र मोटरसाइकलको पछाडि सवार सोही स्थानकी करिब ३६ वर्षीया गीता बुढा घाइते भएको जिल्ला प्रहरी कार्यालय डोल्पाका सूचना अधिकारी टोपेन्द्र बूढा मगरले रंगिन पाटीलाई जानकारी दिए ।

उनका अनुसार दुर्घटनामा चालक नेत्र रोकायको दुबै कुम भाँचिएको छ भने मोटरसाइकलको पछाडि सवार बुढाको बाँया हात फ्र्याक्चर भएको छ। घाइते दुवै जनालाई उपचारका लागि जिल्ला अस्पताल दुनैतर्फ पठाइएको प्रहरीले जनाएको छ।

जनहितमा जारी सन्देश