डोल्पा । हिमाली जिल्ला डोल्पाको छार्का ताङसोङ गाउँपालिकाको केन्द्र कागकोटमा नेपाल टेलिकमले फोरजी सेवा सञ्चालनमा ल्याएको छ ।

समुद्री सतहदेखि करिब ४ हजार २ सय मिटर उचाइमा रहेको मुकोटस्थित टावरमा फोरजी उपकरण जडान गरी माइक्रोवेभ रेडियोमार्फत सेवा सञ्चालन गरिएको नेपाल टेलिकमले जानकारी दिएको छ ।

टेलिकमका प्रवक्ता कमल लामिछानेले यससँगै नेपाल टेलिकमको फोरजी सेवा पुगेका स्थानीय तहको संख्या ७५० पुगेको जानकारी दिएका छन् ।

माथिल्लो डोल्पामा सञ्चालनमा ल्याइएको यो पहिलो फोरजी साइट भएको टेलिकमले जनाएको छ । अब डोल्पाका डोल्पो बुद्ध गाउँपालिका र शे-फोक्सुन्डो गाउँपालिका तथा मनाङको नार्पा भूमि गाउँपालिकामा मात्रै नेपाल टेलिकमको फोरजी सेवा विस्तार हुन बाँकी रहेको बताइएको छ ।

नेपाल टेलिकमले निकट भविष्यमा ती स्थानीय तहहरूमा समेत फोरजी सेवा विस्तारलाई निरन्तरता दिने जनाएको छ । फोरजी सेवा विस्तारसँगै स्थानीय बासिन्दा, पदमार्गमा यात्रा गर्ने पदयात्री तथा पर्यटकहरूको सञ्चार पहुँच सहज हुने अपेक्षा गरिएको छ । साथै प्रशासनिक, सुरक्षा, स्वास्थ्य र शैक्षिक गतिविधिमा समेत यसले सहयोग पुग्ने विश्वास गरिएको छ ।

‘राष्ट्रको सञ्चार’ को रूपमा परिचित नेपाल टेलिकम ले देशका सुगमदेखि अति दुर्गम क्षेत्रसम्म अत्याधुनिक दूरसञ्चार सेवा तथा सूचना प्रविधिको पहुँच विस्तार गर्ने प्रतिबद्धतालाई निरन्तरता दिएको जनाएको छ ।