पूर्ण सार्की/सुर्खेत: सुर्खेतमा मुद्धा मिलाइदिने भन्दै पचास हजार असुली गर्ने दुई जनालाई पक्राउ गरिएको छ।

अभद्र व्यवहारसम्बन्धी मुद्दामा अनुसन्धानको क्रममा प्रहरी हिरासतमा रहेका एक प्रतिवादीलाई ‘मुद्दा मिलाइदिने’ बहानामा ५० हजार रुपैयाँ असुली गरेको आरोपमा दुई जनालाई सुर्खेत प्रहरीले पक्राउ गरेको हो।

जिल्ला प्रहरी कार्यालय सुर्खेतका अनुसार पक्राउ पर्नेमा बर्दिया गेरुवा गाउँपालिका–३ शान्तीबजार घर भई हाल सुर्खेतको वीरेन्द्रनगर नगरपालिका–१० मा डेरा गरी बस्दै आएका करिब ४३ वर्षीय कृष्ण बहादुर थारु र वीरेन्द्रनगर–१३ ईन्द्रपुरकी ३४ वर्षीया मुना चन्द रहेका छन्।

उनीहरूले हिरासतमा रहेका व्यक्तिको परिवारसँग “प्रहरी प्रशासन मिलाइदिन्छु, नत्र तपाईँका मान्छे जेल जान सक्छन्” भन्ने धम्की दिँदै आर्थिक लाभ उठाउने प्रयास गरेका थिए। सोही क्रममा पचास हजार रुपैयाँ वेईमानीपूर्वक असुली गरेको प्रारम्भिक अनुसन्धानबाट खुलेको छ।

दुवैलाई नियन्त्रणमा लिई आपराधिक लाभको कसूरमा सम्मानित अदालतबाट म्याद लिई अनुसन्धान अगाडि बढाइएको जिल्ला प्रहरी कार्यालय सुर्खेतले जनाएको छ।