जाजरकोट: डिभिजन वन कार्यालय जाजरकोटका कार्यालय प्रमुख अमरप्रसाद शाहमाथि कार्यकक्षमै कुटपिट भएको छ। आइतबार दिउँसो करिब ३ बजे तिर कार्यालय समयमै अज्ञात समूह कार्यालयभित्र पसेर शाहमाथि आक्रमण गरेको हो।

प्रमुख शाहका अनुसार उनी सामान्य रूपमा फाइल अध्ययन गरिरहेकै बेला ३–४ जना अपरिचित व्यक्ति अचानक कार्यकक्षमा पसेर आक्रोशित ढंगले कराउँदै दुर्व्यवहार गरेका थिए। त्यसपछि उनीहरू शाहलाई थिचथाच पार्दै कुटपिटमा उत्रिएका थिए।

‘म सामान्य फाइल हेर्दै थिएँ, एक्कासी केही मानिसहरू पसेर कराउन थाले, अनि मलाई हातपात गरे,’ शाहले घटनापछि प्रतिक्रिया दिँदै बताए। कुटपिटबाट उनलाई सामान्य चोटपटक लागेको छ।

केही दिनअघि डिभिजन वन कार्यालयको तालिम हलमा मदिरा सेवन गरेको भन्दै सार्वजनिक भएको एक भिडियोका कारण शाह आलोचनाको घेरामा परेका थिए। आफूविरुद्ध नियोजित षड्यन्त्र भएको दाबी गर्दै शाहले उक्त भिडियो कार्यालय समय बाहिरको भएको र चरित्र हत्या गर्नका लागि प्रचार गरिएको बताएका छन्।

‘मैले कुनै गल्ती गरेको छैन। तर यस्ता घटना नियोजित देखिन्छन्। कुटपिट गर्ने अधिकार कसैलाई छैन’ उनले भने।

जिल्ला प्रहरी कार्यालय जाजरकोटका अनुसार आक्रमणकारीहरूको पहिचान भइनसकेको भए पनि सिसिटिभी फुटेजको आधारमा अनुसन्धान अघि बढाइएको छ। प्रहरी निरीक्षकका अनुसार, ‘कार्यालय परिसरका सिसिटिभी फुटेज संकलन गरिएका छन्। त्यसको विश्लेषणपछि दोषी पहिचान गरी कानुनी कारबाही अघि बढाइने छ।’