पूर्ण सार्की/ सुर्खेत: डिभिजन वन कार्यालय जाजरकोटका कार्यालय प्रमुख अमर प्रसाद शाहमाथि भएको आक्रमणप्रति जाजरकोट जिल्लामा रहेका क्रियाशील कर्मचारी ट्रेड युनियनहरुले एक संयुक्त विज्ञप्ति सार्वजनिक गर्दै आपत्ति जनाएका छन्।

असार २२ गते आईतबार दिउँसो करिब ३ बजे कार्यलय समयमा कार्यकक्षमै रहेका प्रमुख साहमाथि अज्ञात समूहले आक्रमण गरेका थिए ।

जिल्लामा सक्रिय निजामती कर्मचारीहरुको आधिकारिक ट्रेड युनियन, नेपाल निजामती कर्मचारी संगठन, नेपाल निजामती कर्मचारी युनियन, नेपाल राष्ट्रिय कर्मचारी संगठन, एकिकृत सरकारी कर्मचारी संगठनले संयुक्त रुपमा एक ज्ञापनपत्र सार्वजनिक गर्दै आक्रमणको घोर भर्त्सना गरेका छन् । घटनामा संलग्न व्यक्तिहरुलाई छानबिन गरी कानुनी दायरामा ल्याई कडा भन्दा कडा कारवाही गर्न माग समेत गरेका छन्।

यो पनि पढ्नु होस्: कार्यकक्ष मै कुटिए डिभिजन वन कार्यालय जाजरकोटका कार्यालय प्रमुख शाह

ज्ञापनपत्रमा भनिएको छ ‘राज्यको कानुनी दायित्व अनुसार सेवा प्रवाह गरिरहेका राष्ट्रसेवक कर्मचारीहरूमाथि यस्ता अमानवीय व्यवहार हुनु गम्भीर चिन्ताको विषय हो। यदि यस्ता घटनालाई नजरअन्दाज गरियो भने सरकारी सेवा प्रवाहमै अवरोध सिर्जना हुनेछ।’

ट्रेड युनियनहरुले कर्मचारीको सुरक्षाको विषयलाई सर्वोच्च प्राथमिकतामा राख्दै आगामी दिनमा यस्ता घटनाहरूको पुनरावृत्ति हुन नदिन राज्य संयन्त्र र सरोकारवाला निकायहरुलाई आवश्यक सुरक्षा व्यवस्था मिलाउन समेत आग्रह गरेका छन्।

संयुक्त ज्ञापनमा मौलिक हक, नागरिक स्वतन्त्रता, र सेवा प्रवाहमा पारदर्शिता कायम राख्न भन्दै राष्ट्रसेवक कर्मचारीमाथिको आक्रमणको घटना कर्मचारी वृत्त र आम नागरिकका लागि समेत खतरा सावित हुने जानकारी गराएका छन् ।

हेर्नुहोस् ज्ञापन पत्र