पूर्ण सार्की/ सुर्खेत :कर्णाली प्रदेशमा साउन १ गते अर्थात् भोलि सार्वजनिक बिदा दिइने भएको छ। कर्णाली प्रदेश सरकारले साउने सङ्क्रान्ति तथा देउडा पर्वको अवसरमा सार्वजनिक बिदा दिने निर्णय गरेको हो।

गत चैत १७ गते बसेको कर्णाली प्रदेश सरकार (मन्त्रिपरिषद्) काे बैठकले साउन १ गते सार्वजनिक बिदा दिने निर्णय गरेको थियो। सोही निर्णयअनुसार भोलि प्रदेशका सबै सरकारी तथा सार्वजनिक सङ्घसंस्थामा बिदा दिइने कर्णाली प्रदेश सरकार आन्तरिक मामिला तथा कानुन मन्त्रालयका प्रवक्ता तथा उपसचिव उत्तम गौतमले जानकारी दिए।

साउने संक्रान्ति विशेषतः धार्मिक र सांस्कृतिक रूपमा महत्वपूर्ण मानिने पर्व हो । साउने सङ्क्रान्तिमा विशेष गरी कर्णालीका हिमाली जिल्ला डोल्पा, जुम्ला , हुम्ला लगाएतका जिल्लामा आफ्नो घरको छतमा राँका बालेर लुतो फाल्ने प्रचलन  छ।

प्रदेश सरकारले सार्वजनिक बिदा दिँदै सबैलाई पर्वको शुभकामना पनि व्यक्त गरेको छ।