पूर्ण सार्की/ सुर्खेत: हिमाली जिल्ला डोल्पा सहित कर्णालीका विभिन्न जिल्लामा आज साउने सङ्क्रान्ति (लुतो फाल्ने पर्व) परम्परागत शैलीमा मनाएका छन्।

प्रत्येक वर्ष साउन १ गते मनाइने यो पर्व कर्णाली क्षेत्रको मौलिक सांस्कृतिक सम्पदा मात्र नभई स्वास्थ्य र सुरक्षासँग जोडिएको ऐतिहासिक परम्परा पनि हो। विशेषगरी वर्षायाममा देखा पर्ने रोगव्याधि, दुख–कष्ट हटाउनका लागि यो पर्वलाई महत्वपूर्ण मानिन्छ।

डोल्पाको त्रिपुरासुन्दरी नगरपालिकाका बस्तीहरूमा बसोबास गर्ने स्थानीयहरूले आज बिहानै देखि विशेष पूजा–आराधना गर्नुका साथै प्रसिद्ध धार्मिकस्थल श्री बाला त्रिपुरासुन्दर मन्दिर, त्रिपुराकोटमा बिहान देखि दर्शन गर्ने भक्तजनको घुइँचो लगेको थियो ।

दीन भरी घर परिवार इष्टमित्र भलाकुसारी गर्दै साँझपख आफ्नो घरको छतमा झरो (दियालो) दन्काएर घर घरमा राँको बालिएको थियो।

स्थानीयहरूले शरीरका पीडा, रोग–व्याधि हटोस् भन्ने कामना गर्दै ‘ द्वयारको लोइटो’ अर्थात झरोलाई आगोमा होम्दै शंख, घण्टा र बाजागाजासहित विशेष पूजाआजा गरेका थिए। यसरी लुतो फाल्दै पुरानो दुःख–कष्ट परित्याग गर्ने र नयाँ ऊर्जा सहितको जीवन आरम्भ गर्ने यहाँका नागरिककाे विश्वास रहेको छ।

कर्णालीका जनजीवनसँग गहिरो सम्बन्ध राख्ने यो पर्वले सामूहिक एकता, परम्पराको सम्मान र सांस्कृतिक चेतना अभिवृद्धि गर्न महत्वपूर्ण योगदान पुर्‍याउँदै आएको छ।

सङ्क्रान्ति कै अवसर पारेर प्रदेश राजधानी समेत रहेको सुर्खेतको वीरेन्द्रनगरको घण्टाघर, खुला चौर लगायतका क्षेत्रमा कर्णाली बासीले देउडा खेलेर समेत मनाएका छन् ।

साउने सङ्क्रान्ति डोल्पा मात्र नभइ कर्णालीका जुम्ला, हुम्ला , मुगु लगायतका जिल्लामा समेत यसरी नै मनाइएको छ । पर्वको अवसर पारेर आज कर्णाली प्रदेश सरकारले प्रदेशभर सार्वजनिक बिदा समेत दिएको थियो।

तस्बिर हेर्नुहोस्