दिया नेपली /दाङ : जिल्ला प्रहरी कार्यालय दाङले हत्या अभियोगमा फरार रहेको एक महिलालाई २२ वर्षपछि पक्राउ गरेको छ।

२२ वर्षअघि आफ्नै सौताको ९ वर्षीय छोराको हत्या गरेर फरार रहेकी दाङको गढवा गाउँपालिका–७ मानपुरकी ५० वर्षीया बसन्ता शर्मा पण्डितलाई मंगलबार बिहान प्रहरीले काठमाडौंबाट पक्राउ गरेको हो ।

प्रहरीका अनुसार शर्माले २०५९ सालमा आफ्ना श्रीमानको पहिलो पत्नीबाट जन्मिएको छोरा शरद शर्माको हत्या गरेकी थिइन्। हत्या पश्चात जिल्ला अदालत दाङले २०६० साल असोज २६ गते शर्मालाई १० वर्ष कैद सजायको फैसला सुनाएको थियो। तर फैसला अघि नै उनी फरार भएकी थिइन्।

विगत लामो समय देखि इलाका प्रहरी कार्यालय गढवाले फरार रहेकी शर्माको खोजीकार्य गर्दै आएको थियो। हालै उनी काठमाडौं महानगरपालिका–९ गोंगबुमा आफ्ना छोरा केशबराज शर्मासँग बस्दै आएको गोप्य सूचनाका आधारमा दाङ प्रहरीले विशेष टोली काठमाडौं खटाएको थियो। प्रहरी टोलीले साउन २० गते मंगलबार बिहान साढे ८ बजे काठमाडौं महानगरपालिकाको नयाँ बसपार्क क्षेत्रबाट उनलाई पक्राउ गरेको हो।

उनी लामो समय देखि लुकिछिपि दाङ–काठमाडौं आवतजावत गरिरहेकी थिइन्। पक्राउपछि उनलाई दाङ ल्याइएको जिल्ला प्रहरी कार्यालय दाङले जनाएको छ।

इलाका प्रहरी कार्यालय गढवाका प्रमुख डबल बहादुर बमले आफ्नो कार्यक्षेत्रभित्र भएका पुराना आपराधिक घटनाका दोषीलाई कानुनी दायरामा ल्याउन अनुसन्धानलाई तीव्र पारिएको बताएका छन।