डोल्पा: हिमाली जिल्ला डोल्पामा पूजाको लागि बालेको दियोबाट आगलागी हुँदा हजारौंको क्षति भएको छ।

डोल्पाको त्रिपुरासुन्दरी नगरपालिका ०१ नाउला (लेख)मा शुक्रबार राति हरिप्रसाद देवकोटाको खर्क रुमानमा पूजाको लागि बालेको दियोबाट आगलागी हुँदा करिब ६० हजार रुपैयाँ बराबरको क्षति भएको छ।

श्रावण पूर्णिमाको चतुर्दशीको दिनमा देवता पूजाका लागि दियो (बत्ती) बालेर अन्त गएका बेला दियोबाट लुगालत्ता सल्किँदा पुरै रुमाना (खरमा पाल हालेर मान्छे बस्न बनाइएको अस्थायी आवास)मा आगो लागेको थियो। आगलागीमा परी दुई बाख्रा र एक गाई र गाईको बाछा जलेर मरेका छन्। रुमानसाथै लुगालत्ता र अन्नपात पनि नष्ट भएको प्रहरी चौकी त्रिपुराकोटले जानकारी दिएको छ।

प्रहरी चौकी त्रिपुराकोटका इञ्चार्ज यामबहादुर बस्नेतका अनुसार खबर पाएलगत्तै राति करिब ८ बजे प्रहरी टोली घटनास्थल पुगेको थियो। छिमेकीको सतर्कतामा आगलागीबाट अन्य गाईबस्तु बचाइएपछि थप क्षति भने हुन नसकेको र घटना स्थलको सबै मुचुल्का तयार पारेको इन्चार्ज बस्नेतले जानकारी दिए।

रुमानामा आगलागी हुँदा मानवीय क्षति भने भएको छैन।