सुर्खेत। सुर्खेतको वीरेन्द्रनगर नगरपालिका ६ सनिहल लाइनस्थित महाबु गेष्ट हाउसमा जुवातास खेलिरहेको अवस्थामा चार जनालाई प्रहरीले नियन्त्रणमा लिएको छ।

नगर प्रहरी कार्यालय सुर्खेतबाट प्रहरी निरीक्षक (प्र.नि.) दिनेश तिमिल्सेनाको कमाण्डमा खटिएको ७ जनाको टोलीले गोप्य सूचनाका आधारमा बिहीबार दिउँसो करिब २ बजे उक्त गेष्ट हाउसको ३०५ नं. कोठामा छापा मारेर चार जनालाई पक्राउ गरेको हो।

पक्राउ पर्नेहरूमा वीरेन्द्रनगर–७ बस्ने २४ वर्षीय हुकुम शाही, वीरेन्द्रनगर बस्ने ३० वर्षीय हेमन थापा, वडा नं. ९ बस्ने ३४ वर्षीय हेमराज थापा र सोही स्थानका ३६ वर्षीय सुरेश के.सी. रहेका छन्।

प्रहरीले उनीहरूबाट नगद रु. ४१,५२५ र १२ बुक तास बरामद गरेको छ। पक्राउ परेका सबैलाई आवश्यक अनुसन्धान तथा कारबाहीको लागि नगर प्रहरी कार्यालय सुर्खेतमा राखिएको प्रहरीले जनाएको छ।