आज २५७०औँ बुद्ध जयन्ती देशभर विविध कार्यक्रमका साथ मनाइँदै छ। दिवसका अवसरमा सरकारले देशैभर सार्वजनिक बिदा दिएको छ।

सिद्धार्थ गौतमले विश्व शान्ति स्थापनाका लागि पुर्‍याएको योगदानको स्मरणस्वरूप यो पर्व मनाउने गरिन्छ। बुद्धको जन्म, ज्ञान प्राप्ति र महापरिनिर्वाण सबै वैशाख शुक्ल पूर्णिमाकै दिन परेकाले यस दिन नेपालसहित विश्वभरका बौद्ध धर्मावलम्बीहरूले श्रद्धा र भक्तिपूर्वक बुद्ध जयन्ती मनाउने परम्परा छ।

बुद्ध जन्मस्थल लुम्बिनी मा आज विशेष कार्यक्रम आयोजना गरिएको छ। विश्वभरका श्रद्धालुहरूको आस्थाको केन्द्र लुम्बिनीलाई भव्य रूपमा सजाइएको छ। मायादेवी मन्दिर परिसर, पुष्करिणी पोखरी लगायतका क्षेत्रहरू रङ्गीबिरङ्गी बत्तीले झिलीमिली पारिएका छन्।

विभिन्न स्तूपा र विहारहरूलाई पनि आकर्षक ढङ्गले सजाइएको छ। लुम्बिनी विकास कोष ले विशेष सरसफाइ अभियान सञ्चालन गरेपछि अहिले लुम्बिनी क्षेत्र स्वच्छ र सुन्दर देखिएको छ।

दिवसका अवसरमा लुम्बिनीमा विशेष पूजाआजा, प्रार्थना तथा शान्ति र्‍याली आयोजना गरिएको छ। मुख्य समारोह अन्तर्राष्ट्रिय बौद्ध सम्मेलन केन्द्रमा हुने जनाइएको छ।

आयोजकका अनुसार मूल कार्यक्रममा प्रधानमन्त्री बालेन शाहलाई निम्तो गरिए पनि उनी उपस्थित नहुने जानकारी दिएका छन्। प्रमुख अतिथिका रूपमा डोलप्रसाद अर्याल तथा विशिष्ट अतिथिका रूपमा गनेश पौडेल सहभागी हुने कार्यक्रम तय भएको छ।

बुद्ध जयन्ती मनाउन देश तथा विदेशबाट हजारौँ श्रद्धालु लुम्बिनी पुगेका छन्। सुरक्षा व्यवस्थालाई कडा पारिएको छ र भक्तजनहरूले शान्तिपूर्ण रूपमा पर्व मनाउन सक्ने वातावरण मिलाइएको छ।

यस वर्षको बुद्ध जयन्तीले विश्वभर फैलिएको द्वन्द्व र युद्धका बीच शान्ति, सद्भाव र भाइचाराको सन्देश फैलाउने अपेक्षा गरिएको छ।