संघीय संसद् सचिवालयले संघीय संसद्का सबै सदस्यलाई आर्थिक वर्ष २०८२/०८३ को सम्पत्ति विवरण कानुनले तोकेको समयसीमाभित्र अनिवार्य रूपमा पेस गर्न आग्रह गरेको छ।

शुक्रबार सांसद सुविधा व्यवस्थापन शाखाले सार्वजनिक गरेको सूचनामा भ्रष्टाचार निवारण ऐन, २०५९ र अख्तियार दुरुपयोग अनुसन्धान आयोग ऐन, २०४८ बमोजिम सांसदहरूले आफ्नो तथा परिवारका सदस्यहरूको नाममा रहेको सम्पत्तिको अद्यावधिक विवरण स्रोत र प्रमाणसहित बुझाउनुपर्ने उल्लेख गरिएको छ।

सूचनाअनुसार आर्थिक वर्ष २०८२/०८३ समाप्त भएको मितिबाट ६० दिनभित्र अर्थात् २०८३ साउन १ गतेदेखि भदौ २९ गतेसम्म सम्पत्ति विवरण पेस गरिसक्नुपर्ने व्यवस्था रहेको छ।

सचिवालयले विवरण बुझाउँदा सिलबन्दी खाममा सदस्यको नाम, आर्थिक वर्ष, लिङ्ग, पद, कार्यालय, स्थायी ठेगाना, मोबाइल नम्बर र इमेल स्पष्ट रूपमा उल्लेख गर्न निर्देशन दिएको छ। प्रतिनिधिसभा सदस्यले आफ्नो जिल्ला वा निर्वाचन क्षेत्र नम्बर तथा राष्ट्रियसभा सदस्यले आफू निर्वाचित भएको प्रदेशको विवरणसमेत समावेश गर्नुपर्ने जनाइएको छ।

सम्पत्ति विवरण भर्ने आधिकारिक फाराम सांसद सुविधा व्यवस्थापन शाखाबाट प्राप्त गर्न सकिने तथा संघीय संसद् सचिवालयको वेबसाइटबाट पनि डाउनलोड गर्न सकिने सचिवालयले जनाएको छ।