पूर्ण सार्की/ डोल्पा: हिमाली जिल्ला डोल्पाको मुड्केचुला गाउँपालिकाले आर्थिक वर्ष २०८२/८३ मा विनियोजित विकास योजनाहरू समयमै कार्यान्वयन गर्न योजना सम्झौता शिविर सञ्चालन गर्ने भएको छ। पालिकाले आगामी श्रावण २३ गते देखि योजना सम्झौता प्रक्रिया सहज र प्रभावकारी बनाउन वडा–वडामा सम्झौता शिविर सञ्चालन गर्ने निर्णय गरेको छ।

पालिकाले आर्थिक वर्ष २०८२/८३ का लागि विनियोजित विकास योजनाहरू समयमै सम्पन्न गर्न उपभोक्ता समितिमार्फत सञ्चालित हुने सम्पूर्ण योजनाहरूको सम्झौता यहि साउन मसान्तभित्र सम्पन्न गरिने जानकारी दिएको छ। साथै, ठेक्का प्रणालीमार्फत सञ्चालित योजनाहरूको ठेक्का आव्हान भदौ १५ गतेभित्र गरिने जानकारी दिएको छ।

उक्त शिविर मार्फत सम्बन्धित उपभोक्ता समितिहरूसँग आर्थिक वर्ष २०८२/८३ का लागि तयार पारिएका सम्पूर्ण योजनाहरुको सम्झौता गरिनेछ।

गाउँपालिकाले यही श्रावण २३ गते वडा नं १, २ र ३ नं वडाका लागि वडा नं २ को कार्यालय, श्रावण २४ गते वडा नं ४ को लागि सम्बन्धित वडा कार्यालय, २५ गते वडा नं ७ को लागि सम्बन्धित वडा कार्यालय, २६ गते वडा नं ८ को लागि सम्बन्धित वडा कार्यालय, २७ गते वडा नं ९ को लागि सम्बन्धित वडा कार्यालय , २८ गते वडा नं ५ का लागि सम्बन्धित वडा कार्यालय र २९ गते वडा नं ६ का लागि सम्बन्धित वडा कार्यालयमा योजना सम्झौता शिविर सञ्चालन हुने गाउँपालिकाका प्रमुख प्रशासकीय अधिकृत रेशम महताराले जानकारी दिए।

गाउँपालिकाले सम्बन्धित वडा कार्यालय र सरोकारवालाहरूलाई योजना सम्झौता शिविरको लागि आवश्यक पूर्व तयारी र व्यवस्थापनमा जुट्न समेत अनुरोध गरेको छ।