डोल्पा: हिमाली जिल्ला डोल्पामा निर्माणाधिन १०६ मेघावाट क्षमताको जगदुल्ला जलविद्युत आयोजना निर्माणको काम अघि बढाउन निर्देशन दिएको छ। प्रतिनिधिसभाको सार्वजनिक लेखा समितिले निर्माणाधीन जगदुल्ला जलविद्युत् आयोजनालाई कानुन विपरीत नहुने गरी आवश्यक प्रक्रिया अघि बढाउन सम्बन्धित निकायलाई निर्देशन दिएको हो।

बुधबार सिंहदरबारमा बसेको सार्वजनिक लेखा समितिको बैठकले आयोजना निर्माणमा उठेका उजुरीबारे छलफल गर्दै कानुनी प्रक्रिया पूरा गरी काम अघि बढाउनुपर्ने निष्कर्ष निकालेको समितिका सभापति ऋषिकेश पोखरेलले जानकारी दिए। सभापति पोखरेलले सर्वोच्च अदालतमा मुद्दा विचाराधीन भएकाले यसमा थप छलफल आवश्यक नरहेको समेत बताएका छन् ।

अहिले जगदुल्ला हाइड्रोपावर कम्पनी निर्माणका लागि ठेक्का प्रक्रियामा विवाद हुँदा दुई महिनादेखि निर्माण कार्य रोकिएको आयोजनाका प्रमुख कार्यकारी अधिकृत सञ्जय सापकोटाले जानकारी दिए।

जगदुल्ला जलविद्युत आयोजना निर्माण प्रक्रियाको लागि सिनो हाइड्रो कम्पनीले ठेक्कासम्बन्धी उजुरी दिएपछि आयोजना बारे विभिन्न निकायहरूले अनुसन्धान गरिरहेका छन्।

दुई महिना देखि विद्युत निर्माणको काम रोकिएपछि डोल्पा देखि प्रतिनिधित्व गर्ने कर्णाली प्रदेशसभा सदस्य वीर बहादुर शाही र प्रतिनिधि सभा सदस्य धन बहादुर बुढाले सभा मार्फत नै सार्वजनिक लेखा समितिको ध्यानाकर्षण गराएका थिए।