डोल्पा: डोल्पाको त्रिपुरासुन्दरी नगरपालिकाको वडा नम्बर १ का तीनसय घरधुरी दुई साता देखी बिजुली विहिन भएका छन् । छलगार्ड लघु जलविद्युत आयोजनामा प्रयोग भएको मेसिन बिग्रेपछि यस्तो समस्या निम्तिएको हो ।

विश्व वन्यजन्तु कोषको सहयोगमा १८ बर्ष अघि निर्माण भएको उक्त जलविद्युत अहिले स्थानीय उपभोक्ता समिति मार्फत चलिरहेको छ । नगरपालिकाको केन्द्र  समेत रहेको त्रिपुराकोट बगर बजारमा बत्ती नहुँदा दैनिक जनजीवन नै प्रभावित बनेको छ । रातीको समयमा स्थानियहरु खाना पकाउने तेलबाट बत्ती बालेर अध्यारो भगाउन बाध्य छन् ।

आयोजनाका कर्मचारी मोती प्रसाद हमालले एक्कासी मेसिनको बेरिङ बिग्रेपछि विद्युत सेवा अवरुद्ध भएको बताए । उनले बिग्रेको उपकरण बुटवलबाट मगाउनुपर्ने तर त्यसका निम्ती समितीसँग पैसा नभएको बताउँदै भने, ‘कहिलेसम्म अन्धकार हुने हो थाहा छैन् ।’

छलगार्ड लघु जलविद्युत आयोजनाका व्यवस्थापन समितिका अध्यक्ष दिल बहादुर बिष्टले समितिको खातामा रकम नभएकाले पालिकासँग समन्वय गरिरहेको बताए । भने, ‘अघि व्यक्तिसँग ऋण निकालेर बिग्रेको सामान ल्याएर बत्ती बालेका थियाै । पहिलेकै पैसा तिरेको छैन्, अब कसलाई भन्नु ?’

उता त्रिपुरासुन्दरी नगरपालिका १ नं वडा कार्यालयले भने विद्युतकाे सामान खरिदको प्रक्रिया कोटेशन मार्फत अघि बढाएको जानकारी दिएको छ।  ” सामान खरिदको सम्पूर्ण तयारी पूरा भै सकेको र केही दिनमा सामान कार्यालयमा आइपुग्ने छ ” वडा अध्यक्ष रामचन्द्र कुलालले भने” सामान कार्यालयमा आई पुग्नासाथ मर्मत गरी विद्युत सेवालाई निरन्तर गर्ने छौ”

विद्युत सेवा अवरुद्ध भएको महिनौ दिन पुग्न लाग्दा समेत स्थानीय सरकारले चासो नदिएको यहाँका नागरिकले गुनासो पोखेका छन्।विद्युत सेवा अवरुद्ध भए पछि यहाँका नागरिकको जनजीवन अन्धकारमय बनेको छ। विद्यार्थीको पठनपाठनमा समेत प्रभावित भइरहेको छ। विद्युत अझै कहिले बन्ने हो टुंगो छैन। एउटा मोबाइल फोन चार्जको लागि स्थानीय सोलार भएको घरमा शुल्क तिरी चार्ज लगाउन बाध्य छन्।

यही भाको विद्युतलाई स्थानीय सरकारले ध्यान नदिँदा वर्षौ देखि यहाँका नागरिकले सास्ती खेप्दै आइरहेका छन्। नगरपालिकाको प्रशासनिक केन्द्रमै रहेको विद्युत यसरी जीर्ण हुँदा समेत कसैको ध्यान जान सकेको छैन।

भाको भवन, बांध, विद्युतका सामग्री समेत जीर्ण हुँदै जाँदा विद्युतले साझ ६ बजे देखि बिहान ६ बजे सम्म मात्रै सेवा दीरहेको छ। यो सेवा पनि प्रभावित हुँदा यहाँका ३ सय घरधुरी दुई साता देखी अन्धकार जीवन बिताइरहेका छन्।