मुगु — अख्तियार दुरुपयोग अनुसन्धान आयोगले मुगुको सोरु गाउँपालिका-१० मा निर्माण भएको शहीद गेटमा भ्रष्टाचार भएको भन्दै ११ जनाविरुद्ध विशेष अदालतमा मुद्दा दायर गरेको छ।

आयोगका अनुसार शहीद गेट निर्माणको क्रममा सार्वजनिक कोषको दुरुपयोग गर्दै २३ लाख २२ हजार रुपैयाँ बराबरको भ्रष्टाचार भएको पाइएपछि सो कार्यमा संलग्न तत्कालीन प्रमुख प्रशासकीय अधिकृत विरेन्द्र मल्ल, इञ्जिनियर प्रकाश आचार्य, सव-इञ्जिनियर मनोज धामी, लेखापाल जेठ बहादुर बुढा, उपभोक्ता समिति अध्यक्षसहित ११ जनालाई मुद्दा दायर गरिएको हो।

भ्रष्टाचार मुद्दामा संलग्न व्यक्तिहरुले प्राविधिक मूल्यांकन र खर्च विवरणमा हेरफेर गरी योजनाको रकम दुरुपयोग गरेको प्रारम्भिक अनुसन्धानबाट खुलेको आयोगको दाबी छ। अख्तियारले भ्रष्टाचार निवारण ऐन २०५९ अनुसार उनीहरूमाथि कानुनी कारवाहीको माग गर्दै बिहीबार मुद्दा दर्ता गरेको हो।