जाजरकोट: जिल्ला अस्पताल जाजरकोटमा करिब एक महिनादेखि अवरुद्ध रहेको साधारण एक्स–रे सेवा पुनः सञ्चालनमा आएको छ।

जाजरकोटको सदरमुकाम खलंगामा अवस्थित जिल्ला अस्पतालमा रहेको एक्स-रे मेसिनका लागि आवश्यक सामग्री बिग्रिएपछि रोकिएको सेवा मर्मतसम्भार पछि पुनः सञ्चालनमा आएको जिल्ला अस्पताल जाजरकोटले जानकारी दिएको छ।

अस्पतालको एक्सरे मेसिनको मर्मत सम्भार पछि नियमित रूपमा एक्स-रे सेवा पुनः उपलब्ध भएको अस्पतालले जनाएको छ।

अस्पतालका अनुसार अब एक्स–रे सेवा सहज र नियमित रूपमा प्रदान हुनेछ। साथै, छिट्टै अत्याधुनिक प्रविधिसहित अझ प्रभावकारी रुपमा एक्स–रे सेवा सञ्चालनमा ल्याउने तयारी भइरहेको पनि अस्पतालले जानकारी दिएको छ।

जिल्लाकै भरपर्दो अस्पतालको रूपमा हेरिएको जिल्ला अस्पतालको एक्स-रे मेसिनमा समस्या आउँदा सेवा ग्राही स्थानीयमा मर्कामा परेका थिए।