सुर्खेत: १३ औं कोरियन एम्बेस्डर अन्तर्राष्ट्रिय तेक्वान्दोमा सुर्खेतका निशानले स्वर्ण पदक प्राप्त गरेका छन् ।

ललितपुरको सातदोबाटोस्थित नेपाल तेक्वान्दो संघको हलमा मंसिर १५ गतेदेखि २० गतेसम्म सञ्चालन भएको १३ औँ कोरियन एम्बेस्डरमा सुर्खेतको वीरेन्द्रनगर–७ का निशान प्याकुरेलले जुनियर पुरुषको ४८ केजीमुनिको तौल समूहमा प्रतिस्पर्धा गरेका थिए।

इत्राम तेक्वान्दो डोजाङबाट सहभागी उनले कञ्चनपुरका समिर कुँवरलाई पराजित गर्दै स्वर्ण पदक जितेका हुन् । १३औं कोरियन एम्बेस्डर अन्तर्राष्ट्रिय तेक्वान्दो च्याम्पियनसिपमा स्वर्ण पदक जित्ने आफू कर्णाली प्रदेशकै पहिलो खेलाडी रहेको उनले बताए।

सुर्खेतको चिल्ड्रेन प्याराडाइज विद्यालयमा अध्ययनरत निशानले यसअघि १३औं र १४औं राष्ट्रपति रनिङ सिल्डमा पनि स्वर्ण पदक जितेका थिए। यस्तै नेपाल तेक्वान्दो संघले आयोजना गरेको एनटीए लिगमा पनि उनले तेस्रो स्थान हात पारेका थिए। निशान संघले सञ्चालन गरेको जुनियर राष्ट्रिय टोलीमा पनि परेका थिए। उनी सुर्खेतको इतराम डोजाङका प्रशिक्षक पनि हुन्। उनी डोजाङमा खेलाडीलाई प्रशिक्षण गराउनुका साथै आफै प्रशिक्षण पनि गर्छन्।

च्याम्पियनसिपमा नेपाल, भारत, पाकिस्तान, बंगलादेश र भुटानका खेलाडीले प्रतिस्पर्धा थिए। चिल्ड्रेन, क्याडेट, जुनियर र सिनियर स्पर्धामा ग्योरोगी, पुम्सेसँगै पारा तेक्वान्दोलाई पनि समावेश गरिएको थियो। दक्षिण एसियाका पाँच देशका एक हजार पाँच सय ३० खेलाडीले प्रतिस्पर्धा गरेको च्याम्पियनसिपमा कर्णाली प्रदेशका प्याकुरेलले भिन्न रुपमा चर्चा बटुले।